Qonys ıelerin quttyqtaǵan oblys ákimi A. Batalov Taldyqorǵan qalasyn damytýdyńjosparyna, sonyń ishinde 7-shaǵyn aýdanda salynatyn qurylys nysandaryna qysqasha toqtalyp, jańa baspanalaryna qutty bolsyn aıtty.
– Halyqty turǵyn úımen qamtamasyz etý týraly Elbasynyń tapsyrmasyna sáıkes oblysta aýqymdy jumystar atqarylyp jatyr. Taldyqorǵan qalasy da kúnnen kúnge kórkeıip keledi. Sonyń bir aıǵaǵy – búgin jańa páterlerge qol jetkizip otyrsyzdar. Oblys ortalyǵyndaǵy jańa baspanalaryńyz qutty bolsyn. Shańyraqtaryńyz shattyq pen qýanyshqa, otbasylaryńyz baqyt pen yrysqa tolsyn! – dedi A. Batalov. «Qazaqstannyń Turǵyn úı jınaq banki» AQ Basqarma tóraıymy Lázzat Ibragımova da kópshilikke izgi tilegin jetkizip, qýanyshtaryna ortaqtasty. Jańa qonys ıeleri de ońdy memlekettik saıasattyń nátıjesinde baspanaly bolý baqytyna ıe bolyp otyrǵandaryn aıtyp, Prezıdenttiń atyna rızashylyqtaryn jetkizdi.
Kilt tapsyrý saltanatynyń aldynda oblys ákimi A. Batalov pen «Qazaqstannyń Turǵyn úı jınaq banki» AQ Basqarma tóraıymy Lázzat Ibragımova jeke turǵyn úı qurylysyn damytý týraly ózara yntymaqtastyq memorandýmyna qol qoıdy.
L. Ibragımovanyń aıtýynsha, «Nurly jer» baǵdarlamasy sheńberinde qos tarap kelisimi boıynsha jyl sońyna deıin Taldyqorǵanda banktiń qatysýymen kotejdi qalashyqta 48 jer úı salynyp, paıdalanýǵa beriledi dep josparlanyp otyr. Al munan keıingi eki jyl ishinde osyndaı jeke turǵyn úıler sanyn 600-ge jetkizý mejelengen.
«Nurly jer» baǵdarlamasy negizinde jeke turǵyn úıler salynatyn jer alańdarynyń ınjenerlik ınfraqurylymyn jasaýǵa tolyq qoldaý kórsetemiz. Eń bastysy onyń nátıjesin halyq kóredi», - dedi Amandyq Ǵabbasuly.
Atalmysh banktiń Almaty oblysynda 43 myńnan astam salymshysy bar, ıaǵnı oblys respýblıka kóleminde salymshylarynyń sany jaǵynan aldyńǵy qatarda. Bul – Almaty oblysynyń ortalyq qalasynda ǵana emes, Qaskeleń, Talǵar sıaqty shaǵyn qalalarynda da ınfraqurylymnyń jaqsy damyǵanynyń nátıjesi. «Turǵyn úı jınaq banki» AQ Óńirlerdi damytýdyń 2020 jylǵa deıingi baǵdarlamasy sheńberinde oblysta 74,1 myń sharshy metr turǵyn úı salǵan. Sonyń ishinde «Turǵyndardyń barlyq sanatyna arnalǵan turǵyn úı» baǵyty boıynsha 41,1 myń sharshy metrlik 12 úı nemese 609 páter salynsa, «Jas otbasylarǵa arnalǵan turǵyn úı» baǵyty boıynsha 33 myń sharshy metrlik 7 úı nemese 593 páterdi paıdalanýǵa berilgen. Jalpy 2017 jyly 6 úı salý josparlansa, sonyń 4-eýi Taldyqorǵanda bolmaq.
Almaty oblysy ákiminiń baspasóz qyzmeti.
https://dalanews.kz/28559
