Jetisý oblysyna jumys saparymen kelgen «QazaqGaz» UK» AQ Basqarma tóraǵasy Sanjar Jarkeshov «Taldyqorǵan-Úsharal» magistraldy gaz qubyry qurylysynyń barysymen tanysty. Resmi qonaqtardy Aqsý aýdanyndaǵy qurylys alańyna oblys ákiminiń orynbasary Áset Qanaǵatov bastap bardy. Belgili bolǵandai, «Taldyqorǵan - Úsharal» gaz qubyrynyń jelilik bóligin salý jumystary aiaqtalǵan. Qazir avtomatty gaz taratý stantsiialary turǵyzylýda, dep habarlaidy Dalanews.kz
Aldymen «Jansúgirov» AGTS-ynyń alańyna barǵan resmi qonaqtar mundaǵy atqarylyp jatqan jumystarmen tanysty. Bul rette S. Jarkeshov birinshi kezekte jumystyń sapasyna basa kóńil bólýdi qatań tapsyrdy.
- Búgingi kúni «Taldyqorǵan – Úsharal» magistraldy gaz qubyryn salýǵa úlken nazar aýdarylyp otyr. Bul - Memleket basshysynyń tapsyrmasymen, Ulttyq qordyń qarjylai qoldaýymen qolǵa alynǵan aýqymdy joba. Ótken jyly Úkimet basshysy Jetisý oblysyna kelgende qurylys jumystary bastalǵan bolatyn. Jobanyń áleýmettik mańyzyn eskere otyryp, jumystardy qarqyndy júrgizdik. Sonyń nátijesinde jobany belgilengen merziminen bir jarym jyl buryn, iaǵni 2025 jyldyń jylytý maýsymyna deiin bitiremiz dep josparlap otyrmyz. Bul «QazaqGaz», oblys ákimdigi jáne merdiger kompaniia – úsh taraptyń birlesken úlgili komandalyq jumysynyń nátijesi, - dedi «QazaqGaz» UK» «QazaqGaz» UK» AQ Basqarma tóraǵasy Sanjar Jarkeshov.
Atap ótsek, jobanyń tehnologiialyq shemasyna sáikes, gaz qubyrynyń jalpy uzyndyǵy 302,441 km quraidy, jobalyq qysymy RR=9,8 MPa. Jobada sondai-aq 6 gaz qubyry-burmasyn jáne «Jansúgirov», «Qapal», «Sarqan», «Qoilyq», «Qabanbai», «Úsharal» - 6 avtomatty gaz taratý stantsiiasyn salý kózdelgen.
Búgingi tańda jańa gaz qubyrynyń jelilik bóliginiń qurylysy aiaqtaldy. Sondai-aq, kedergilerden ótetin ýchaskelerdi: kúrdeli tabiǵi bederler, sý asty ótkelderi jáne t. b.salý boiynsha jumystar aiaqtalý satysynda.
Qazirgi tańda barlyq alty avtomatty gaz taratý stantsiialarynyń qurylystary qatar bastaldy. Stantsiialardyń daiyndyǵy osy jyldyń tamyz aiyna josparlanǵan. Qurylysqa 148 birlik arnaiy tehnika men 356 jumysshy personal jumyldyryldy. Qurylys jumystary erekshe baqylaýda jáne kesteden ozyp keledi.
Osy oraida oblys ákiminiń orynbasary Áset Qanaǵatov eldi mekenderdiń ishki jelilerin júrgizýdiń daiyndyq jumystary týraly aita kele:
- «Taldyqorǵan - Úsharal» magistraldy gaz qubyry jobasynyń arqasynda Aqsý, Sarqan, Alakól aýdandarynda 66 eldi mekenge gaz tartylatyn bolady. Sonyń ishinde 6 eldi mekendi biyl, qalǵan 60-yn kelesi jyly gazǵa qosamyz. Sonyń ishinde Aqsý qant zaýyty da bar. Osy sharalardyń barlyǵy halyqtyń turmys sapasyn jaqsartý úshin, sol siiaqty kásipkerlik pen óndiris oryndarynyń jumysy úshin de tiimdi. Bul óńirdiń ekonomikasyn damytýǵa úlken serpin beredi,– dedi Á.Qanaǵatov.
Munan soń resmi ókilder «Qapal» AGTS-ynyń qurylys jumystaryn da baryp kórdi.
Eske salsaq, Jetisý oblysynda 192 eldi meken gazdandyrýǵa jatady. Oblys bólingende nebary 5 eldi mekende ǵana gaz bolǵan, búgingi kúni gazdandyrylǵan eldi mekender sany 84-ke jetip, gazdandyrý deńgeii 58,2 % qurap otyr. Jyl sońyna deiin kógildir otyn tartylǵan eldi mekender sanyn 126-ǵa, gazdandyrý kórsetkishin 71,4% jetkizý josparlanyp otyr, iaǵni 500 myń adam gazdyń igiligin kóredi degen sóz. Oǵan qosa «Taldyqorǵan - Úsharal» magistraldy gaz qubyry qurylysynyń arqasynda 66 eldi meken gazǵa qosylady. Sóitip 2028 jylǵa deiin oblystyń gazdandyrýǵa jatatyn 192 eldi mekeni tolyq kógildir otynǵa qol jetkizetin bolady.
