Tailand politsiiasy Bangkoktaǵy Sývarnabhými halyqaralyq áýejaiynda elden ketpek bolǵan Avstraliia azamatyn ustady. Ol 17 jastaǵy qyzdyń ólimine qatysy bolýy múmkin degen kúdikke ilindi, dep habarlaidy dalanews.kz.
Aldyn ala málimet boiynsha, 46 jastaǵy Saimon Kerman Pattaiia qalasynda jergilikti boijetkenmen tanysqan. Biraz ýaqyttan keiin qyz iz-túzsiz joǵalyp ketken.
Tergeý barysynda beinebaqylaý kameralarynyń jazbalary zertteldi. Kadrlardan er adamnyń tańǵa jýyq qyzben birge qonaqúige kirgeni kórinedi. Al sol kúni keshke ol ǵimarattan kólemdi qara chemodandy súirep shyqqan.
Jazbada er adamnyń chemodandy mototsiklge jetkizip, ony kólikke bekitýge uzaq ýaqyt jumsaǵany baiqalady. Shamamen 20 minýttan keiin ol qonaqúige qolynda eshteńesiz qaityp kelgen.
Qyzdyń dostary onymen bailanysa almaǵannan keiin politsiiaǵa júgingen. Keiin temirjol mańynan onyń denesi salynǵan chemodan tabyldy.
Kúdikti óz kinásin moiyndaǵan joq. Onyń aitýynsha, qyz er adam uiyqtap jatqan kezde qonaqúi bólmesinen shyǵyp ketken.
Tergeýdiń aldyn ala nusqasy boiynsha, olardyń arasynda aqshaǵa bailanysty janjal shyǵýy múmkin. Qonaqúi bólmesinen tóbeles izderi tabylǵan. Sondai-aq kúdiktiniń beti men moinynan tyrnalǵan izder anyqtalǵan.
Politsiia bul jaraqattar qyzdyń qarsylyq kórsetkenin bildirýi múmkin dep boljap otyr. Al Avstraliia azamaty olardy órmekshi shaqqannan qalǵan izder dep túsindirgen.
Kúdiktiniń beinebaqylaý kameralaryndaǵy jazbalarǵa qatysty ne aitqany ázirge belgisiz. Oqiǵanyń barlyq mán-jaiy tergeý barysynda anyqtalady.
