Semei qalasynyń arnaýly áleýmettik qyzmetterge muqtaj balalardy qoldaý ortalyǵynyń tárbielenýshileri ormanda ózin durys ustaý, tabiǵatty qorǵaý jáne qaýipsizdik talaptaryn saqtaý jónindegi mańyzdy erejelerdi «Semei ormany» memlekettik orman tabiǵi rezervatyna uiymdastyrylǵan tanymdyq ekskýrsiia barysynda bildi, dep habarlaidy dalanews.kz.
Tabiǵat aiasyndaǵy kezdesý «Taza Qazaqstan» ekologiialyq baǵdarlamasy aiasynda turaqty túrde uiymdastyrylyp keledi. Bul joly ekskýrsiia arnaiy áleýmettik qyzmetterge muqtaj balalardy qoldaý ortalyǵynyń tárbielenýshilerine arnaldy.
Is-sharanyń negizgi maqsaty – balalardyń tabiǵatqa degen súiispenshiligin arttyrý, qorshaǵan ortany qorǵaýdyń mańyzyn túsindirý, sondai-aq ormandy aýmaqtaǵy qaýipsizdik talaptaryn saqtaýǵa úiretý. Ekskýrsiia barysynda balalar tabiǵat aiasynda serýendep qana qoimai, ormannyń ekojúiesi, ondaǵy ósimdikter men janýarlar dúniesi týraly mol maǵlumat aldy.
Ekskýrsiia «Semei ormany» rezervatynyń Pavlodar tas joly boiyndaǵy aýmaǵynda ótti. Balalarǵa Qyzyl kordon orman sharýashylyǵynyń qyzmetkerleri jetekshilik jasap, ormanda ózin-ózi ustaý jáne qaýipsizdik erejelerin túsindirdi.
Orman mamandary tabiǵi aýmaqtyń erekshe qorǵalatynyn atap ótip, kelýshiler tarapynan belgilengen talaptardyń qatań saqtalýy qajettigin aitty. Ásirese órt qaýipsizdigine erekshe nazar aýdaryldy. Orman alqabynda ot jaǵýǵa, qoqys tastaýǵa, tabiǵi ortaǵa ziian keltirýge jáne beibereket júrip-turýǵa bolmaityny túsindirildi.
«Orman alqaby úlken bolǵandyqtan, memlekettik deńgeide qorǵalady. Sondyqtan bul aýmaqta beisaýat júrýge bolmaidy. Eń aldymen, kelýshiler qaýipsizdik erejelerin muqiiat saqtaýy qajet. Ot jaǵýǵa tyiym salynady. Sondai-aq qoqys tastap, tabiǵatqa ziian keltirýge bolmaidy. Biz tárbielenýshilerge osy máseleler boiynsha qajetti baǵyt-baǵdar berdik», – deidi «Semei ormany» MOTR Qyzyl kordon orman sharýashylyǵynyń basshysy Qýanysh Qaiyrhanov.
Ekskýrsiia barysynda balalar orman sharýashylyǵy qyzmetkerlerimen birge tabiǵat aiasynda serýendep, ormannyń tynys-tirshiligimen jaqynyraq tanysty. Mamandar orman aýmaǵynda ósetin ósimdikter, mekendeitin janýarlar men qustar týraly aityp, olardyń tabiǵi tepe-teńdikti saqtaýdaǵy mańyzyna toqtaldy.
Balalarǵa tabiǵatty qorǵaýdyń qarapaiym, biraq mańyzdy qaǵidalary da túsindirildi. Atap aitqanda, qoqysty arnaiy oryndarǵa tastaý, ósimdikterdi syndyrmaý, qustar men janýarlarǵa ziian keltirmeý, orman ishinde ot jaqpaý jáne órt qaýipsizdigi talaptaryn saqtaý qajettigi aityldy.
Tárbielenýshiler úshin ekskýrsiianyń taǵy bir ereksheligi – tabiǵatty tikelei baqylaý arqyly jańa aqparat alý múmkindigi boldy. Olar ormannyń tabiǵi erekshelikterin kórip, túrli ósimdikterge nazar aýdaryp, qorshaǵan orta týraly ózderin qyzyqtyrǵan suraqtaryn mamandarǵa qoidy.
Tabiǵat aiasyndaǵy serýen balalarǵa erekshe áser syilady.
«Biz búgin tabiǵat aiasyna shyǵyp, ormannyń qandai úlken ekenin kórip, tańǵaldyq. Munda tabiǵat óte ádemi eken. Aýasy da taza. Ormanshy aǵailar bizge qorshaǵan ortany taza ustaý kerektigin jáne tabiǵatty qorǵaýdyń mańyzyn túsindirdi. Búgin kóp nárse bildik», – dedi ortalyq tárbielenýshileri.
Mundai ekologiialyq is-sharalar balalardyń tabiǵatqa janashyrlyqpen qaraýyna, qorshaǵan ortany qorǵaýǵa degen jaýapkershiligin qalyptastyrýǵa yqpal etedi. Sonymen qatar tabiǵat aiasyndaǵy tanymdyq kezdesýler jasóspirimderdiń bos ýaqytyn tiimdi ótkizip, jańa bilim men tájiribe jinaqtaýyna múmkindik beredi.
«Taza Qazaqstan» aktsiiasy aiasyndaǵy osyndai bastamalar ekologiialyq mádenietti qalyptastyrýmen qatar, tabiǵatty aialaý qundylyqtaryn jas urpaqtyń boiyna sińirýge baǵyttalǵan.
