Qazaqstan Respýblikasynyń Syrtqy ister ministrligi el aýmaǵy Reseidegi nysandarǵa jasalǵan ushqyshsyz ushý apparattarynyń shabýyldary úshin paidalanyldy degen aqparatqa qatysty resmi málimdeme jasady, dep habarlaidy dalanews.kz.
Ministrliktiń málimetinshe, sońǵy kúnderi keibir buqaralyq aqparat quraldary men internet-resýrstarda Qazaqstanǵa qatysty arandatýshylyq sipattaǵy jáne shyndyqqa sáikes kelmeitin aqparattar taralyp jatyr.
"Atalǵan málimdemeler shyndyqqa janaspaidy jáne eshqandai derektermen nemese faktilermen rastalmaidy", – dep málimdedi Syrtqy ister ministrligi.
Vedomstvonyń baǵalaýynsha, mundai negizsiz boljamdar Qazaqstan men Resei arasyndaǵy dástúrli dostyq jáne tatý kórshilik qarym-qatynastardyń sipatyn burmalaýǵa baǵyttalǵan.
Ministrlik Qazaqstannyń syrtqy saiasaty tatý kórshilik, ózara qurmet jáne memleketterdiń ishki isterine aralaspaý qaǵidattaryna negizdeletinin atap ótti. Sondai-aq elimizdiń halyqaralyq quqyq talaptary men halyqaralyq jáne óńirlik qaýipsizdik salasyndaǵy mindettemelerin turaqty túrde oryndap kele jatqany aityldy.
"Qazaqstan Respýblikasy óz aýmaǵynyń, áýe keńistiginiń jáne infraqurylymynyń basqa memleketterge qarsy baǵyttalǵan is-qimyldardy júzege asyrý úshin paidalanylýyna jol bermeý qaǵidatyn berik ustanady", – delingen ministrlik málimdemesinde.
Osyǵan bailanysty vedomstvo buqaralyq aqparat quraldary men qoǵam ókilderin tek tekserilgen aqparatqa súienýge jáne shyndyqqa sáikes kelmeitin málimetterdi taratpaýǵa shaqyrdy.
