Kelesi jyly barlyq avtomobil ótkizý pýnktin sapaly qaita jańǵyrtý jumysyn aiaqtaý qajet. Bul týraly Prezident Qasym-Jomart Toqaev "Jańa tarihi kezeńdegi Qazaqstannyń ózekti mindetteri" atty Qazaqstan halqyna Joldaýynda málimdedi, dep habarlaidy dalanews.kz.
"Aldymyzda respýblikalyq jáne jergilikti mańyzy bar barlyq avtomobil jolyn sapaly salý mindeti tur. Barlyq joldy aityp otyrmyn. Ortalyqtaǵy jáne jergilikti jerlerdegi atqarýshy organdar túrli erejeler men reglamentterdi alǵa tartyp, máseleni bir-birine siltep, naǵyz "fýtbolǵa" ainaldyrdy. Taqyrypty aiaqasty etip, máseleni sheshýdiń ornyna ony tuiyqqa tiredi. Sondyqtan mynadai tapsyrma beremin: respýblikalyq mańyzy bar, iaǵni ortalyqtyń qaramaǵyndaǵy jáne barlyq joldyń shamamen 26 paiyzyn quraityn joldar bolsyn, ákimdikterdiń qaramaǵyndaǵy jergilikti joldar bolsyn - olardyń barlyǵymen Kólik ministrligi arqyly Úkimet ainalysýy kerek. Qaitalap aitamyn: bizge óte sapaly joldar qajet. Bitým men qiyrshyqtastyń sapasyn syltaý etýge jol berilmeidi", - dedi Toqaev.
