Qazaqstanda bir adam ekinshi adamǵa páterdi syiǵa tartqan jaǵdaida, ony alǵan azamat jeke tabys salyǵyn (JTS) tólemeidi. Bul týraly Memlekettik kirister komiteti túsindirme berdi, dep habarlaidy dalanews.kz.
Vedomstvonyń málimetinshe, jeke tulǵanyń basqa bir jeke tulǵadan tegin negizde alǵan múlki, onyń ishinde syiǵa tartylǵan nemese muraǵa qalǵan múlik salyq salynatyn tabys bolyp sanalmaidy.
Sondyqtan syilyqqa alǵan páter úshin jeke tabys salyǵyn tóleýdiń qajeti joq.
Alaida bul ereje kásipkerlik maqsatta paidalanýǵa arnalǵan múlikti tegin alǵan jeke kásipkerlerge qoldanylmaidy.
Syiǵa alǵan páterdi satsańyz ne bolady?
MKK málimetinshe, eger syiǵa alynǵan páter menshik ieliginde eki jyldan az ýaqyt bolyp, 2026 jyly satylsa, kei jaǵdaida jeke tabys salyǵy týyndaýy múmkin.
Mundai jaǵdaida salyq salynatyn tabys páterdi satý baǵasy men onyń baǵalaý quny arasyndaǵy oń aiyrma retinde esepteledi.
Baǵalaý quny retinde menshik quqyǵy paida bolǵan jyldyń 1 qańtaryndaǵy múlik salyǵyn esepteý úshin belgilengen qun alynady.
Sonymen qatar erekshe jaǵdai da bar. Eger múlik 2026 jyldyń 1 qańtaryna deiin tegin alynyp, al satý 2026 jyldyń 1 qańtarynan keiin júzege assa, burynǵy tártip qoldanylady. Iaǵni menshik merzimi eki jyl emes, bir jyldan az bolǵan jaǵdaida ǵana salyq máselesi qaralady.
Salyq qalai esepteledi?
Komitettiń túsindirýinshe, tegin alynǵan múlikti satqan kezde satyp alý quny bolmaǵandyqtan, ósimnen túsetin tabys retinde kóbine satý qunynyń ózi esepke alynady.
Degenmen Salyq kodeksinde birqatar erekshelik qarastyrylǵan:
eger múliktiń quny buryn salyq salynatyn tabys retinde esepke alynǵan bolsa, sol qun negizge alynady;
mura nemese qaiyrymdylyq retinde alynǵan múlik úshin naryqtyq qun qoldanylady;
turǵyn úi sekildi múlik obektileri úshin baǵalaý quny esepke alynady;
jer ýchaskeleri boiynsha kadastrlyq qun paidalanylady;
ózge jaǵdailarda satyp alý quny nólge teń dep esepteledi.
Osylaisha, syilyqqa berilgen páterdi alǵan azamat oǵan birden salyq tólemeidi. Biraq mundai baspanany keiin satý kezinde menshik merzimi men baǵalaý qunyna bailanysty salyq mindettemesi týyndaýy múmkin.
