Qazaqstanda 2026 jylǵy astyqty satyp alý baǵasy belgilendi. 3-synypty bidaidyń tonnasy sapasyna qarai 92-115 myń teńge aralyǵynda bolady, dep habarlaidy dalanews.kz.
Bul týraly Premer-ministrdiń orynbasary – Ulttyq ekonomika ministri Serik Jumanǵarin Qostanai oblysynyń sharýalarymen kezdesýinde málimdedi.
Ministrdiń aitýynsha, baǵa byltyrǵy deńgeide saqtalady. Azyq-túlik kelisimshart korporatsiiasynyń baǵasy astyq naryǵyndaǵy negizgi baǵdarlardyń biri bolady.
«Naryq koniýnktýrasyn, sondai-aq naryqqa qatysýshylardyń usynystaryn eskere kelip, Úkimet 2026 jylǵy astyqtyń satyp alý baǵasyn aiqyndady. Atap aitqanda, 3-synypty bidai baǵasyn sapalyq kórsetkishine bailanysty 92-den 115 myń teńgege deiin belgileý josparlanýda. Osylaisha, baǵa ótken jylǵy deńgeide qalady», – dedi Serik Jumanǵarin.
Agrarshylardy qoldaý úshin astyqty forvardtyq jáne tikelei satyp alý tetikteri qoldanylady. Bul sharýalarǵa óndiristik shyǵyndaryn óteýge jáne kelesi egis naýqanyna daiyndalýǵa múmkindik beredi.
Sonymen qatar astyq treiderlerine QQS-ty qaitarý josparlanyp otyr. Eksporttaýshylardyń QQS-ty qaitarýǵa ótinishteri salyqtyq tekserý arqyly qaralady. Bul rette ónimniń óndirýshiden eksporttaýshyǵa deiingi qozǵalysy men salyq tólemderi tolyq tekseriledi.
Jumanǵarin astyq eksportyna jumsalatyn shyǵyndardy óteýge arnalǵan memlekettik baǵdarlama 2026-2027 marketingtik jylǵa uzartylatynyn da aitty.
Kólik shyǵyndaryn sýbsidiialaý qazaqstandyq astyqtyń eksporttyq naryǵyn keńeitýge múmkindik bergen. Sonyń arqasynda sońǵy jyldary Belgiia, Polsha, Portýgaliia, Norvegiia, Ulybritaniia, Marokko, Aljir jáne Mysyrǵa qazaqstandyq bidai jetkizile bastaǵan. Azyq-túlik kelisimshart korporatsiiasy Qytai arqyly Vetnamǵa astyq jóneltýdiń mýltimodaldy baǵytyn da synaqtan ótkizgen.
Kezdesýde mal sharýashylyǵy máseleleri de talqylandy. Arqalyq, Amangeldi jáne Jangeldin aýdandarynda 1132 fermerlik sharýashylyq jumys isteidi. Bul óńirlerdegi jalpy egis kólemi 581,1 myń gektardy quraidy.
Sharýalar «Jailaý» baǵdarlamasyndaǵy jaiylymdardy sýlandyrý jáne mal sharýashylyǵy bazalaryn salý talaptaryn qaita qaraýdy usyndy. Olardyń aitýynsha, kóptegen sharýashylyqta qajetti infraqurylym men tabiǵi sý kózderi bar. Sondyqtan qoldanystaǵy nysandardy baǵdarlama talaptaryn oryndaý kezinde esepke alý usynyldy.
Sondai-aq fermerler asyl tuqymdy iri qaranyń jeńildetilgen nesie arqyly satyp alynatyn shekti baǵasyn qaita qaraýdy surady. Serik Jumanǵarin Aýyl sharýashylyǵy ministrligine tiisti ózgeristerdi pysyqtap, asyl tuqymdy maldyń quny boiynsha anyqtamalyq ázirleýdi tapsyrdy.
Arqalyqta asyl tuqymdy mal sharýashylyǵyn damytýǵa baǵyttalǵan genetikalyq ortalyq qurý jobasy da tanystyryldy. «Zengi Group» JShS direktory Jánibek Kenjebaevtyń aitýynsha, jobaǵa investitsiia tartylǵan.
