Shyǵys Qazaqstan oblysynyń ákimi Nurymbet Saqtaǵanov Halyqaralyq balalardy qorǵaý kúnine orai óńirdiń belsendi ári daryndy balalarymen kezdesip, olardy merekemen quttyqtady, dep habarlaidy dalanews.kz.
Aimaq basshysy oblystyń namysyn respýblikalyq jáne halyqaralyq olimpiadalarda, ǵylymi, shyǵarmashylyq jáne sporttyq jarystarda abyroimen qorǵap júrgen oqýshylardyń jetistikterin atap ótti.
Balalar merekesine orai oblys ákimi jas shyǵysqazaqstandyqtarǵa aqshalai sertifikattar tabystady. Sonymen qatar olardyń árqaisysyna «Daryn» jazǵy saýyqtyrý lagerine joldama syiǵa tartyldy.
«Memleket basshysy Qasym-Jomart Toqaev balalar men jastardy qoldaýdy memlekettik saiasattyń mańyzdy basymdyqtarynyń biri retinde qarastyrady. Sondyqtan bizdiń ortaq maqsatymyz – árbir balaǵa jan-jaqty damýǵa, sapaly bilim alýǵa jáne ómirden óz ornyn múmkindik jasaý», – dedi Shyǵys Qazaqstan oblysynyń ákimi.
Saltanatty bólimnen keiin jas qonaqtarǵa merekelik kontserttik baǵdarlama uiymdastyryldy. Gala-kontsertte oblystyń aýdandary men qalalarynan kelgen talantty bi ujymdary men vokaldyq ansamblder óner kórsetti. Olarǵa da aqshalai sertifikattar tabystaldy.
ShQO ákimi oqýshylarǵa oqý, ǵylym, sport jáne shyǵarmashylyqtaǵy jetistikteri úshin alǵys bildirdi:
«Biyl oblys oqýshylary jeńip alǵan 171 medal – úlken maqtanysh. Biraq odan da mańyzdysy – elimizdiń bolashaǵyn qalyptastyratyn bastamashyl, talantty ári maqsatshyl jas býynnyń ósip kele jatqany».
Aita keteiik, biyl jas shyǵysqazaqstandyqtar respýblikalyq jáne halyqaralyq olimpiadalar men baiqaýlarda 171 medal jeńip aldy. Onyń ishinde 37 altyn, 46 kúmis jáne 88 qola medal bar. Bul óńirdegi bilim berý sapasynyń joǵary deńgeiin jáne jastardyń zor áleýetin taǵy bir márte dáleldeidi.
