Tsifrlyq shabýyldyń qurbany bolǵan jýrnalist Samal Ibraeva memleketten arasha surady. Keiingi kúnderi jýrnalistiń telefonyna maza joq. Belgisiz bireýler onyń sýreti, jeke deregi men bailanys nómirin Kyzdar.net intim-qyzmet kórsetý saityna jalǵan anketamen jariialaǵan. Sodan beri jýrnalistiń telefony "jarylyp" jatyr: anaiy usynystar qarsha boraǵan. Tipti tanystary da habarlasyp, oqyrmandar da "ne jaǵdai?" dep mazasyn alǵan,- dep habarlaidy Dalanews.kz.
Bul jaǵdai – kezdeisoq emes, maqsatty túrde jasalǵan qasaqana qastandyq ekenin aitady Samal Ibraeva. Ulysmedia.kz portalynyń bas redaktory retinde talai márte "maqalany óshir, fotony alyp tasta, áitpese jaǵdaiyń qiyn bolady" degen qysym men eskertýler alǵanyn da jasyrmaidy. Aqyry tapsyrysty oryndaýshylar tsifrlyq shabýyl arqyly jýrnalisti qaralaýdy kózdegen.
Jýrnalistiń pikirinshe, bul árekettiń negizgi sebebi – Ulysmedia.kz kótergen ótkir máseleler.
"Bizdiń maqalalarymyz kimniń jolyn kesip ótti, kimdi yńǵaisyz jaǵdaida qaldyrdy? Osyǵan jaýap tabý mańyzdy. Biz táýelsiz basylym retinde halyq pen memleket múddesi úshin shyndyqty jazamyz. Sondyqtan bul shabýyldy milliondaǵan oqyrmanymyz sóz bostandyǵyna jasalǵan qysym dep qabyldap otyr", – deidi Ibraeva.
Oqiǵaǵa qatysty politsiiaǵa shaǵym túsirilgenimen, bes kún ótkende ǵana tártip saqshylary isti "kiberqylmys jáne tsifrlyq býlling" dep baǵalap, qylmystyq is qozǵaǵan. Jýrnalist osyǵan uqsas oqiǵany eki jyl buryn da bastan keshkenin eske alady. Ol kezde tergeý Prezident Qasym-Jomart Toqaevtyń aralasýynan keiin ǵana jandanǵan edi.
Samal Ibraeva bul joly da Memleket basshysynyń qoldaýyna úmit artyp, oǵan arnaiy úndeý joldady.
"Qurmetti Prezident myrza, men – táýelsiz jýrnalist, qoǵam qairatkeri, eń aldymen, Qazaqstan Respýblikasynyń azamaty retinde sizge júginýge májbúrmin. Óitkeni bul – eldegi kez kelgen áiel adamnyń basyna túsýi múmkin aýyr tsifrlyq zorlyq-zombylyq. Sizden osy qylmystyq istiń tergelýin baqylaýǵa alýyńyzdy suraimyn", – dep atap ótti ol óz úndeýinde.
"Bul jaǵdai jýrnalistik kásibime tikelei qysym" dep sanaidy Ibraeva.
Ol politsiia bul qylmystyń tapsyrys berýshisin anyqtap, jalǵan aqparatty joiyp, saitty buǵattaidy degen úmitte. Samal Ibraeva qysym men qorqytýǵa qaramastan, redaktsiianyń jumysy toqtamaitynyn, qoǵam úshin mańyzdy, ótkir máselelerdi jazýdy jalǵastyratynyn basa aitty.
