سيفرلىق شابۋىلدىڭ قۇربانى بولعان جۋرناليست سامال يبرايەۆا مەملەكەتتەن اراشا سۇرادى. كەيىنگى كۇندەرى ءجۋرناليستىڭ تەلەفونىنا مازا جوق. بەلگىسىز بىرەۋلەر ونىڭ سۋرەتى، جەكە دەرەگى مەن بايلانىس ءنومىرىن Kyzdar.net ينتيم-قىزمەت كورسەتۋ سايتىنا جالعان انكەتامەن جاريالاعان. سودان بەرى ءجۋرناليستىڭ تەلەفونى "جارىلىپ" جاتىر: انايى ۇسىنىستار قارشا بوراعان. ءتىپتى تانىستارى دا حابارلاسىپ، وقىرماندار دا "نە جاعداي؟" دەپ مازاسىن العان،- دەپ حابارلايدى Dalanews.kz.
بۇل جاعداي – كەزدەيسوق ەمەس، ماقساتتى تۇردە جاسالعان قاساقانا قاستاندىق ەكەنىن ايتادى سامال يبرايەۆا. Ulysmedia.kz پورتالىنىڭ باس رەداكتورى رەتىندە تالاي مارتە "ماقالانى ءوشىر، فوتونى الىپ تاستا، ايتپەسە جاعدايىڭ قيىن بولادى" دەگەن قىسىم مەن ەسكەرتۋلەر العانىن دا جاسىرمايدى. اقىرى تاپسىرىستى ورىنداۋشىلار سيفرلىق شابۋىل ارقىلى ءجۋرناليستى قارالاۋدى كوزدەگەن.
ءجۋرناليستىڭ پىكىرىنشە، بۇل ارەكەتتىڭ نەگىزگى سەبەبى – Ulysmedia.kz كوتەرگەن وتكىر ماسەلەلەر.
"ءبىزدىڭ ماقالالارىمىز كىمنىڭ جولىن كەسىپ ءوتتى، كىمدى ىڭعايسىز جاعدايدا قالدىردى؟ وسىعان جاۋاپ تابۋ ماڭىزدى. ءبىز تاۋەلسىز باسىلىم رەتىندە حالىق پەن مەملەكەت مۇددەسى ءۇشىن شىندىقتى جازامىز. سوندىقتان بۇل شابۋىلدى ميلليونداعان وقىرمانىمىز ءسوز بوستاندىعىنا جاسالعان قىسىم دەپ قابىلداپ وتىر"، – دەيدى يبرايەۆا.
وقيعاعا قاتىستى پوليسياعا شاعىم تۇسىرىلگەنىمەن، بەس كۇن وتكەندە عانا ءتارتىپ ساقشىلارى ءىستى "كيبەرقىلمىس جانە سيفرلىق بۋللينگ" دەپ باعالاپ، قىلمىستىق ءىس قوزعاعان. جۋرناليست وسىعان ۇقساس وقيعانى ەكى جىل بۇرىن دا باستان كەشكەنىن ەسكە الادى. ول كەزدە تەرگەۋ پرەزيدەنت قاسىم-جومارت توقايەۆتىڭ ارالاسۋىنان كەيىن عانا جاندانعان ەدى.
سامال يبرايەۆا بۇل جولى دا مەملەكەت باسشىسىنىڭ قولداۋىنا ءۇمىت ارتىپ، وعان ارنايى ۇندەۋ جولدادى.
"قۇرمەتتى پرەزيدەنت مىرزا، مەن – تاۋەلسىز جۋرناليست، قوعام قايراتكەرى، ەڭ الدىمەن، قازاقستان رەسپۋبليكاسىنىڭ ازاماتى رەتىندە سىزگە جۇگىنۋگە ءماجبۇرمىن. ويتكەنى بۇل – ەلدەگى كەز كەلگەن ايەل ادامنىڭ باسىنا ءتۇسۋى مۇمكىن اۋىر سيفرلىق زورلىق-زومبىلىق. سىزدەن وسى قىلمىستىق ءىستىڭ تەرگەلۋىن باقىلاۋعا الۋىڭىزدى سۇرايمىن"، – دەپ اتاپ ءوتتى ول ءوز ۇندەۋىندە.
"بۇل جاعداي جۋرناليستىك كاسىبىمە تىكەلەي قىسىم" دەپ سانايدى يبرايەۆا.
ول پوليسيا بۇل قىلمىستىڭ تاپسىرىس بەرۋشىسىن انىقتاپ، جالعان اقپاراتتى جويىپ، سايتتى بۇعاتتايدى دەگەن ۇمىتتە. سامال يبرايەۆا قىسىم مەن قورقىتۋعا قاراماستان، رەداكسيانىڭ جۇمىسى توقتامايتىنىن، قوعام ءۇشىن ماڭىزدى، وتكىر ماسەلەلەردى جازۋدى جالعاستىراتىنىن باسا ايتتى.
