10-20 tamyz aralyǵynda Dýshanbede AQSh áskeriniń qatysýymen áskeri jattyǵý ótken. Oǵan Tájikstan, Qazaqstan, Qyrǵyzstan, Ózbekstan, Pákistan jáne Mońǵoliia áskerleri qatysqan.
Nikolai Patrýshev AQSh-tyń Ortalyq Aziiaǵa áskeri jattyǵý ótkizýinde, "áskeri qimylynyń múmkindigin igerý, qarýdy dál kózdeý úshin tsifrly kartalaryna ózgerister engizý maqsaty jatyr" dep málimdedi.
Patrýshev bul málimdemesin Tashkentte ótken ShYU-ǵa múshe elderdiń Qaýipsizdik qyzmeti hatshylarynyń kezdesýinde aitty. Onyń bul málimdemesin 23 tamyzda reseilik "Argýmenty i fakty" gazeti jariialady.
Patrýshev "Vashington Aýǵanstanmen kórshi eldermen antiterroristik operatsiia júrgizý maqsatynda ýaqytsha infraqurylym júrgizýge talpynyp jatyr" dep baibalap saldy.
"ShYU-ǵa múshe elder amerikalyq bastamanyń bizdiń qaýipsizdigimizge qandai qater tóndirip turǵanyn oilanady degen úmittemin" dedi Patrýshev.
Qandai "qaýip tóndirip turǵanyn" RF Qaýipsizdik qyzmeti hatshysy aitpady. Resei Ýkrainaǵa soǵys ashqannan keiin, Máskeý men Vashington qatynasy birden nasharlap ketkeni belgili. Búginde AQSh Ýkrainaǵa áskeri kómek kórsetip keledi.
Tájikstannyń Qaýipsizdik qyzmetiniń hatshysy Nasrýllo Mahmýdzoda reseilik áriptesiniń málimdemesine pikirin bildirdi.
– Patrýshev myrza Reseimen strategiialyq áriptestik ózgerissiz qalady. Tájikstan men Reseidiń strategiialyq qarym-qatynasyna eshqandai qaýip tónip turǵan joq, – dedi ol. Nasrýllo Mahmýdzoda Tájikstan syrtqy saiasatta ashyq ekenin, barlyq eldermen, onyń ishinde AQSh jáne Eýropa elderimen de konstrýktivti bailanys júrgize beretinin jetkizdi.
AQSh-tyń Tájikstandaǵy elshisi Djon Mark Pommershaim 10 tamyzda "Aimaqtyq yntymaqtastyq – 2022" áskeri oqý jattyǵýy AQSh-tyń Ortalyq Aziia jáne Ońtústik Aziia elderimen qarym-qatynasty damytýǵa ári nyǵaitýǵa jaqsy múmkindik" dep málimdegen.
