10-20 تامىز ارالىعىندا دۋشانبەدە اقش اسكەرىنىڭ قاتىسۋىمەن اسكەري جاتتىعۋ وتكەن. وعان تاجىكستان، قازاقستان، قىرعىزستان، وزبەكستان، پاكىستان جانە موڭعوليا اسكەرلەرى قاتىسقان.
نيكولاي پاترۋشيەۆ اقش-تىڭ ورتالىق ازياعا اسكەري جاتتىعۋ وتكىزۋىندە، "اسكەري قيمىلىنىڭ مۇمكىندىگىن يگەرۋ، قارۋدى ءدال كوزدەۋ ءۇشىن سيفرلى كارتالارىنا وزگەرىستەر ەنگىزۋ ماقساتى جاتىر" دەپ مالىمدەدى.
پاترۋشيەۆ بۇل مالىمدەمەسىن تاشكەنتتە وتكەن شىۇ-عا مۇشە ەلدەردىڭ قاۋىپسىزدىك قىزمەتى حاتشىلارىنىڭ كەزدەسۋىندە ايتتى. ونىڭ بۇل مالىمدەمەسىن 23 تامىزدا رەسەيلىك "ارگۋمەنتى ي فاكتى" گازەتى جاريالادى.
پاترۋشيەۆ "ۆاشينگتون اۋعانستانمەن كورشى ەلدەرمەن انتيتەرروريستىك وپەراسيا جۇرگىزۋ ماقساتىندا ۋاقىتشا ينفراقۇرىلىم جۇرگىزۋگە تالپىنىپ جاتىر" دەپ بايبالاپ سالدى.
"شىۇ-عا مۇشە ەلدەر امەريكالىق باستامانىڭ ءبىزدىڭ قاۋىپسىزدىگىمىزگە قانداي قاتەر ءتوندىرىپ تۇرعانىن ويلانادى دەگەن ۇمىتتەمىن" دەدى پاترۋشيەۆ.
قانداي "ءقاۋىپ ءتوندىرىپ تۇرعانىن" رف قاۋىپسىزدىك قىزمەتى حاتشىسى ايتپادى. رەسەي ۋكرايناعا سوعىس اشقاننان كەيىن، ماسكەۋ مەن ۆاشينگتون قاتىناسى بىردەن ناشارلاپ كەتكەنى بەلگىلى. بۇگىندە اقش ۋكرايناعا اسكەري كومەك كورسەتىپ كەلەدى.
تاجىكستاننىڭ قاۋىپسىزدىك قىزمەتىنىڭ حاتشىسى ناسرۋللو ماحمۋدزودا رەسەيلىك ارىپتەسىنىڭ مالىمدەمەسىنە پىكىرىن ءبىلدىردى.
– پاترۋشيەۆ مىرزا رەسەيمەن ستراتەگيالىق ارىپتەستىك وزگەرىسسىز قالادى. تاجىكستان مەن رەسەيدىڭ ستراتەگيالىق قارىم-قاتىناسىنا ەشقانداي ءقاۋىپ ءتونىپ تۇرعان جوق، – دەدى ول. ناسرۋللو ماحمۋدزودا تاجىكستان سىرتقى ساياساتتا اشىق ەكەنىن، بارلىق ەلدەرمەن، ونىڭ ىشىندە اقش جانە ەۋروپا ەلدەرىمەن دە كونسترۋكتيۆتى بايلانىس جۇرگىزە بەرەتىنىن جەتكىزدى.
اقش-تىڭ تاجىكستانداعى ەلشىسى دجون مارك پوممەرشايم 10 تامىزدا "ايماقتىق ىنتىماقتاستىق – 2022" اسكەري وقۋ جاتتىعۋى اقش-تىڭ ورتالىق ازيا جانە وڭتۇستىك ازيا ەلدەرىمەن قارىم-قاتىناستى دامىتۋعا ءارى نىعايتۋعا جاقسى مۇمكىندىك" دەپ مالىمدەگەن.
