Sol kezde QR Parlamenti Májilisi depýtaty, «Aq jol» fraktsiiasy múshesi Qazybek Isa ministrge eldiń alańdaýshylyǵyn týdyryp otyrǵan Úkimettiń elektrondyq platformasyn Reseidiń «Sberbankine» berý máselesi jáne Tsifrlandyrý salasyndaǵy, egov platformasyndaǵy memlekettik tildiń qoldanylý deńgeii týraly suraq qoidy.
– Qazaqstannyń tsifrlandyrý deńgeii jaqsy damýda. Oǵan jańa sizdiń jasaǵan baiandamańyzdan da kózimiz jetti. Biz BUU-nyń halyqaralyq reitingi boiynsha onlain-qyzmet boiynsha 11-shi orynda, elektrondyq úkimet boiynsha 29 orynda, elektrondyq qaýipsizdigi boiynsha 31 oryndamyz. Tipti, Reseidiń aldyndamyz! Endeshe búkil 19 million qazaqstandyqtardyń jeke málimeti bar memlekettiń elektrondyq úkimetin túgel shet memleketke – Reseidiń «Sberbankine» bere salýdy qalai túsindiresiz?!. Bul biyl 30 jyl tolyp otyrǵan Táýelsizdigimizge nuqsan emes pe? – dep depýtat suraqty tótesinen qoiǵan bolatyn.
Osylai tsifrlandyrý platformamyzdyń Reseige berilýine qarsy shyqqan Qazybek Isa búgingi Reseige AQSh pen Batys elderiniń elektrondyq tosqaýyly men sanktsiialaryn dál boljap aityp bergen edi…
– Eger AQSh erteń Reseige álemdik eń aldyńǵy qatarly baǵdarlamalarǵa qol jetkizýge tosqaýyl qoisa biz qaitemiz? «Eki túie súikense shybyn óledi» degendei, shyryldap, bosqa qurban bolyp ketpeimiz be? – degen edi.
Endi mine, 2022 jyly 15 sáýir kúni QR Tsifrlyq damý, innovatsiialar jáne aeroǵarysh ónerkásibi vitse-ministri A. Jambaqin Qazaqstannyń tsifrlandyrý platformasy Reseidegi aýyr jaǵdaiǵa bailanysty «Sberge» berilmeitinin málimdedi.
– Bul qazirgi geosaiasi jaǵdaiǵa bailanysty jáne ózimizdiń múmkindikterimizdi qaita qarap, qazaqstandyq IT kompaniialaryn tarta otyryp, «NIT» AQ arqyly platformamyzdy óz kúshimizben jasaýǵa sheshim qabyldadyq. Qazir tehnikalyq-ekonomikalyq saraptama jasalýda. Biylǵy jyldyń aiaǵyna deiin jańa platforma jasalyp, alǵashqy servister paidalanýǵa beriledi, – dep jaýap berdi vitse-ministr jýrnalister suraǵyna.
– Tsifrlandyrý platformamyz Resei «Sberine» berilmeitin boldy. Sol kezde aitqanbyz ministrge, erteń AQSh álemdik tsifrlik baǵdarlamalarǵa Reseige tosqaýyl qoisa, qaitemiz degen edik, sol týra keldi. Reseige qazir álemdik baǵdarlamalarǵa jol jabylǵan, tastúnekte. Bizdiń platformamyz Sberge ótkende, biz de tosqaýylǵa tap bolar edik, – deidi Qazybek Isa.
