Astana qalasynyń Tsifrlandyrý jáne memlekettik qyzmetter basqarmasy Astana Hub jáne Astana Innovations uiymdarymen birlesip, qalalyq infraqurylymnyń negizgi salalaryna ozyq tehnologiialardy engizýge baǵyttalǵan Astana Smart City Accelerator baǵdarlamasyn júzege asyrdy, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
20 qarashada baǵdarlamanyń Demo Day finaldyq kezeńi ótip, qatysýshylar qala ómirin ózgertip jatqan innovatsiialyq sheshimderdi usyndy.
Tańdalǵan startaptar Astananyń memlekettik emhanalarynda, mektepterinde, qoǵamdyq kólikterinde, sondai-aq qalalyq qyzmetter men infraqurylym nysandarynda sátti iske qosyldy.
Bul jobalar meditsinalyq uiymdardyń jumysyn ońtailandyryp, dárigerlerge túsetin júktemeni azaitady, oqý oryndary men áleýmettik mekemelerdegi qaýipsizdikti arttyrady, resýrstardy únemdep, qalalyq qyzmetterdiń sapasyn jaqsartady.
Baǵdarlama tehnologiialyq qaýymdastyqtyń úlken qyzyǵýshylyǵyn týdyrdy. 128 ótinimniń ishinen 107 joba bastapqy irikteýden ótti, al finalister Astana Hub-tyń Seed Money baǵdarlamasy arqyly 5 million teńgege deiin qarjylandyrý aldy. Qatysýshylarǵa sonymen qatar saraptamalyq qoldaý kórsetilip, sheshimderin naqty jaǵdaida synaqtan ótkizýge múmkindik beretin infraqurylym usynyldy.
Demo Day-da usynylǵan startaptar:
- Protector AI – beinejazbalardy taldaýǵa arnalǵan jasandy intellekt negizindegi júie. Ol soqqy, qulaý jáne iterý siiaqty zorlyq-zombylyq sipattaryn anyqtai alady.
- AdsIQ – qoǵamdyq kóliktegi monitorlarda kontent pen jarnamany basqarýǵa arnalǵan jasandy intellekt negizindegi júie.
- SPLASH – ekologiialyq taza mobildi kólik jýý qyzmeti, ol qala ishinde qorshaǵan ortaǵa ziian keltirmei avtokólikterdi jýýǵa múmkindik beredi.
- HOOOD – tsifrlyq syrtqy jarnamany (DOOH) basqarýǵa arnalǵan platforma, ol jarnama berýshilerge, ásirese, shaǵyn jáne orta bizneske, jarnamalyq naýqandardy naqty ýaqyt rejiminde iske qosyp, beiimdeýge qolaily qural usynady.
- Autism Spectrum – aýtizmi bar balalar men olardyń ata-analaryna arnalǵan Qazaqstan aýditoriiasyna baǵyttalǵan qosymsha.
- Rationeel – bultty sheshim men mobildi qosymshany biriktiretin gibridti júie. Ol biznes-protsesterdi tsifrlandyrý jáne derekterdi jinaýdy ońtailandyrýǵa beiimdelgen.
- i-ConS – qurylys pen jóndeý jumystaryn basqarýdy, jobalardyń biýdjetin baqylaýdy jáne materialdardy qadaǵalaýdy jeńildetetin mobildi qosymsha ári veb-interfeis.
- Green Cars Qazaqstanda elektromobilder infraqurylymyn damytýmen ainalysyp, IT-platforma men zariadtaý stantsiialary jelisin usynady.
- Hi Doctor – dárigerdiń klinikalyq kómekshisi rólin atqaratyn klinikalyq sheshimderdi qoldaý júiesi.
- qMed – qant diabeti, arteriialyq gipertenziia men júrek jetkiliksizdigi siiaqty sozylmaly juqpaly emes aýrýlardy basqarýǵa arnalǵan platforma.
Astana Smart City Accelerator baǵdarlamasy ozyq tehnologiialardy qalalyq ortaǵa engizýdiń tiimdiligin dáleldep qana qoimai, Astanany tsifrlyq tehnologiialar ortalyǵy retinde damytýǵa negiz boldy. Pilottyq jobalardyń nátijeleri tehnologiialardyń qazirdiń ózinde qaladaǵy ózekti máselelerdi sheship, turǵyndardyń ómir sapasyn jaqsartyp kele jatqanyn kórsetýde.
Aldaǵy kezeńde úzdik sheshimderdi Qazaqstannyń basqa da óńirlerine masshtabtaý jáne halyqaralyq naryqtarǵa shyǵarý josparlanyp otyr, bul Astananyń básekege qabilettiligin nyǵaityp, ony eldegi aqyldy qalalardy damytýdyń úlgisine ainaldyrady.
