استانا قالاسىنىڭ سيفرلاندىرۋ جانە مەملەكەتتىك قىزمەتتەر باسقارماسى Astana Hub جانە Aستaنa Innovations ۇيىمدارىمەن بىرلەسىپ، قالالىق ينفراقۇرىلىمنىڭ نەگىزگى سالالارىنا وزىق تەحنولوگيالاردى ەنگىزۋگە باعىتتالعان Astana Smart City Accelerator باعدارلاماسىن جۇزەگە اسىردى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
20 قاراشادا باعدارلامانىڭ Demo Day فينالدىق كەزەڭى ءوتىپ، قاتىسۋشىلار قالا ءومىرىن وزگەرتىپ جاتقان يننوۆاسيالىق شەشىمدەردى ۇسىندى.
تاڭدالعان ستارتاپتار استانانىڭ مەملەكەتتىك ەمحانالارىندا، مەكتەپتەرىندە، قوعامدىق كولىكتەرىندە، سونداي-اق قالالىق قىزمەتتەر مەن ينفراقۇرىلىم نىساندارىندا ءساتتى ىسكە قوسىلدى.
بۇل جوبالار مەديسينالىق ۇيىمداردىڭ جۇمىسىن وڭتايلاندىرىپ، دارىگەرلەرگە تۇسەتىن جۇكتەمەنى ازايتادى، وقۋ ورىندارى مەن الەۋمەتتىك مەكەمەلەردەگى قاۋىپسىزدىكتى ارتتىرادى، رەسۋرستاردى ۇنەمدەپ، قالالىق قىزمەتتەردىڭ ساپاسىن جاقسارتادى.
باعدارلاما تەحنولوگيالىق قاۋىمداستىقتىڭ ۇلكەن قىزىعۋشىلىعىن تۋدىردى. 128 ءوتىنىمنىڭ ىشىنەن 107 جوبا باستاپقى ىرىكتەۋدەن ءوتتى، ال فيناليستەر Astana Hub-تىڭ Seed Money باعدارلاماسى ارقىلى 5 ميلليون تەڭگەگە دەيىن قارجىلاندىرۋ الدى. قاتىسۋشىلارعا سونىمەن قاتار ساراپتامالىق قولداۋ كورسەتىلىپ، شەشىمدەرىن ناقتى جاعدايدا سىناقتان وتكىزۋگە مۇمكىندىك بەرەتىن ينفراقۇرىلىم ۇسىنىلدى.
Demo Day-دا ۇسىنىلعان ستارتاپتار:
- Protector AI – بەينەجازبالاردى تالداۋعا ارنالعان جاساندى ينتەللەكت نەگىزىندەگى جۇيە. ول سوققى، قۇلاۋ جانە يتەرۋ سياقتى زورلىق-زومبىلىق سيپاتتارىن انىقتاي الادى.
- AdsIQ – قوعامدىق كولىكتەگى مونيتورلاردا كونتەنت پەن جارنامانى باسقارۋعا ارنالعان جاساندى ينتەللەكت نەگىزىندەگى جۇيە.
- SPLASH – ەكولوگيالىق تازا ءموبيلدى كولىك جۋۋ قىزمەتى، ول قالا ىشىندە قورشاعان ورتاعا زيان كەلتىرمەي اۆتوكولىكتەردى جۋۋعا مۇمكىندىك بەرەدى.
- HOOOD – سيفرلىق سىرتقى جارنامانى (DOOH) باسقارۋعا ارنالعان پلاتفورما، ول جارناما بەرۋشىلەرگە، اسىرەسە، شاعىن جانە ورتا بيزنەسكە، جارنامالىق ناۋقانداردى ناقتى ۋاقىت رەجيمىندە ىسكە قوسىپ، بەيىمدەۋگە قولايلى قۇرال ۇسىنادى.
- Autism Spectrum – ءاۋتيزمى بار بالالار مەن ولاردىڭ اتا-انالارىنا ارنالعان قازاقستان اۋديتورياسىنا باعىتتالعان قوسىمشا.
- Rationeel – بۇلتتى شەشىم مەن ءموبيلدى قوسىمشانى بىرىكتىرەتىن گيبريدتى جۇيە. ول بيزنەس-پروسەستەردى سيفرلاندىرۋ جانە دەرەكتەردى جيناۋدى وڭتايلاندىرۋعا بەيىمدەلگەن.
- i-ConS – قۇرىلىس پەن جوندەۋ جۇمىستارىن باسقارۋدى، جوبالاردىڭ بيۋدجەتىن باقىلاۋدى جانە ماتەريالداردى قاداعالاۋدى جەڭىلدەتەتىن ءموبيلدى قوسىمشا ءارى ۆەب-ينتەرفەيس.
- Green Cars قازاقستاندا ەلەكتروموبيلدەر ينفراقۇرىلىمىن دامىتۋمەن اينالىسىپ، IT-پلاتفورما مەن زاريادتاۋ ستانسيالارى جەلىسىن ۇسىنادى.
- Hi Doctor – دارىگەردىڭ كلينيكالىق كومەكشىسى ءرولىن اتقاراتىن كلينيكالىق شەشىمدەردى قولداۋ جۇيەسى.
- qMed – قانت ديابەتى، ارتەريالىق گيپەرتەنزيا مەن جۇرەك جەتكىلىكسىزدىگى سياقتى سوزىلمالى جۇقپالى ەمەس اۋرۋلاردى باسقارۋعا ارنالعان پلاتفورما.
Astana Smart City Accelerator باعدارلاماسى وزىق تەحنولوگيالاردى قالالىق ورتاعا ەنگىزۋدىڭ تيىمدىلىگىن دالەلدەپ قانا قويماي، استانانى سيفرلىق تەحنولوگيالار ورتالىعى رەتىندە دامىتۋعا نەگىز بولدى. پيلوتتىق جوبالاردىڭ ناتيجەلەرى تەحنولوگيالاردىڭ ءقازىردىڭ وزىندە قالاداعى وزەكتى ماسەلەلەردى شەشىپ، تۇرعىنداردىڭ ءومىر ساپاسىن جاقسارتىپ كەلە جاتقانىن كورسەتۋدە.
الداعى كەزەڭدە ۇزدىك شەشىمدەردى قازاقستاننىڭ باسقا دا وڭىرلەرىنە ماسشتابتاۋ جانە حالىقارالىق نارىقتارعا شىعارۋ جوسپارلانىپ وتىر، بۇل استانانىڭ باسەكەگە قابىلەتتىلىگىن نىعايتىپ، ونى ەلدەگى اقىلدى قالالاردى دامىتۋدىڭ ۇلگىسىنە اينالدىرادى.
