Sidneide musylman azamaty Ahmed ál-Ahmed halyqty terroristerden qutqaryp qaldy, dep habarlaidy Dalanews.kz.
Sidneilik jemis satýshy, musylman Ahmed ál-Ahmed, otbasynyń aitýynsha, ómirinde eshqashan qolyna qarý ustap kórmegen. Soǵan qaramastan, ol jalǵyz ózi táýekelge baryp, terroristi zalalsyzdandyryp, onyń myltyǵyn tartyp alyp, osylaisha kóptegen adamnyń ómirin saqtap qaldy.
Ahmed ál-Ahmed 43 jasta, qarýdy qoldanýdy bilmeidi jáne jemis satatyn dúken ustaidy. Sidneide atys jasaǵandardyń birin jalań qolmen toqtatqan bul adam týraly málimet az.
Eki balanyń ákesi Ahmed ál-Ahmedtiń erligi videoǵa túsip qalǵan. Jazbada aq fýtbolka kigen er adam sol. Kadrda ál-Ahmed mergenderdi syrt jaǵynan kórip, olardyń birine qarai júgirip baryp, myltyǵyn julyp alady. Osylaisha ol kóptegen jannyń ómirin aman alyp qalady.
Odan keiin ál-Ahmed qarýdy shabýyldaýshyǵa baǵyttaidy, al ol qashyp ketedi. Er adam myltyqty aǵashqa súiep, qolyn joǵary kóterip, politsiiaǵa óziniń bul shabýylǵa qatysy joq ekenin isharamen bildiredi. Dál osy sátterde batyr ekinshi mergennen eki ret jaralanady: aiaǵy men qolynyń saýsaq tusynan oq tiedi.
Izrail premer-ministri Biniamin Netaniahý er adamǵa jeke alǵysyn bildirdi.
«Biz batyl adamnyń áreketin kórdik. Ol musylman eken. Men oǵan qurmet kórsetemin. Ol terroristerdiń birine jazyqsyz evreilerdi óltirýge jol bermedi», – dedi Netaniahý.
Netaniahý sonymen qatar Avstraliiadaǵy áriptesi Entoni Albanizege elde júrgizilip jatqan saiasattyń «antisemitizmdi órshitip otyrǵanyn» eskertkenin aitty. Izrail biligi politsiia terroristik akt dep baǵalaǵan bul shabýyldyń yqtimal tapsyrys berýshilerine qatysty tergeý júrgizip jatyr.
Ál-Ahmed aýrýhanaǵa jetkizilip, oǵan ota jasaldy. Otbasy onyń jaqyn arada saýyǵyp ketetinine úmittenedi.
Sidneidegi terakt saldarynan 12 adam qaza tapty, olardyń biri – shabýyl jasaǵandardyń ózi. Taǵy shamamen 30 adam jaraqat aldy. Qara kiingen belgisiz er adamdar Bondi-bich jaǵalaýynda Hanýka meiramyn atap ótip jatqan jergilikti evrei qaýymdastyǵy ókilderine oq jaýdyrǵan.
