سيدنەيدە مۇسىلمان ازاماتى احمەد ال-احمەد حالىقتى تەرروريستەردەن قۇتقارىپ قالدى، دەپ حابارلايدى Dalanews.kz.
سيدنەيلىك جەمىس ساتۋشى، مۇسىلمان احمەد ال-احمەد، وتباسىنىڭ ايتۋىنشا، ومىرىندە ەشقاشان قولىنا قارۋ ۇستاپ كورمەگەن. سوعان قاراماستان، ول جالعىز ءوزى تاۋەكەلگە بارىپ، تەرروريستى زالالسىزداندىرىپ، ونىڭ مىلتىعىن تارتىپ الىپ، وسىلايشا كوپتەگەن ادامنىڭ ءومىرىن ساقتاپ قالدى.
احمەد ال-احمەد 43 جاستا، قارۋدى قولدانۋدى بىلمەيدى جانە جەمىس ساتاتىن دۇكەن ۇستايدى. سيدنەيدە اتىس جاساعانداردىڭ ءبىرىن جالاڭ قولمەن توقتاتقان بۇل ادام تۋرالى مالىمەت از.
ەكى بالانىڭ اكەسى احمەد ال-احمەدتىڭ ەرلىگى ۆيدەوعا ءتۇسىپ قالعان. جازبادا اق فۋتبولكا كيگەن ەر ادام سول. كادردا ال-احمەد مەرگەندەردى سىرت جاعىنان كورىپ، ولاردىڭ بىرىنە قاراي جۇگىرىپ بارىپ، مىلتىعىن جۇلىپ الادى. وسىلايشا ول كوپتەگەن جاننىڭ ءومىرىن امان الىپ قالادى.
ودان كەيىن ال-احمەد قارۋدى شابۋىلداۋشىعا باعىتتايدى، ال ول قاشىپ كەتەدى. ەر ادام مىلتىقتى اعاشقا سۇيەپ، قولىن جوعارى كوتەرىپ، پوليسياعا ءوزىنىڭ بۇل شابۋىلعا قاتىسى جوق ەكەنىن يشارامەن بىلدىرەدى. ءدال وسى ساتتەردە باتىر ەكىنشى مەرگەننەن ەكى رەت جارالانادى: اياعى مەن قولىنىڭ ساۋساق تۇسىنان وق تيەدى.
يزرايل پرەمەر-مينيسترى بينيامين نەتانياحۋ ەر ادامعا جەكە العىسىن ءبىلدىردى.
«ءبىز باتىل ادامنىڭ ارەكەتىن كوردىك. ول مۇسىلمان ەكەن. مەن وعان قۇرمەت كورسەتەمىن. ول تەرروريستەردىڭ بىرىنە جازىقسىز ەۆرەيلەردى ولتىرۋگە جول بەرمەدى»، – دەدى نەتانياحۋ.
نەتانياحۋ سونىمەن قاتار اۆسترالياداعى ارىپتەسى ەنتوني البانيزەگە ەلدە جۇرگىزىلىپ جاتقان ساياساتتىڭ «انتيسەميتيزمدى ءورشىتىپ وتىرعانىن» ەسكەرتكەنىن ايتتى. يزرايل بيلىگى پوليسيا تەرروريستىك اكت دەپ باعالاعان بۇل شابۋىلدىڭ ىقتيمال تاپسىرىس بەرۋشىلەرىنە قاتىستى تەرگەۋ جۇرگىزىپ جاتىر.
ال-احمەد اۋرۋحاناعا جەتكىزىلىپ، وعان وتا جاسالدى. وتباسى ونىڭ جاقىن ارادا ساۋىعىپ كەتەتىنىنە ۇمىتتەنەدى.
سيدنەيدەگى تەراكت سالدارىنان 12 ادام قازا تاپتى، ولاردىڭ ءبىرى – شابۋىل جاساعانداردىڭ ءوزى. تاعى شامامەن 30 ادام جاراقات الدى. قارا كيىنگەن بەلگىسىز ەر ادامدار بوندي-بيچ جاعالاۋىندا حانۋكا مەيرامىن اتاپ ءوتىپ جاتقان جەرگىلىكتى ەۆرەي قاۋىمداستىعى وكىلدەرىنە وق جاۋدىرعان.
