Bul týraly ol álemjelidegi paraqshasynda jazdy.
Ol nelikten ómirimen qoshtaspaq bolǵanyn aita kelip, jelidegilerden ádildik úshin kúresýge kómek surady.
"Adam taǵdyrymen "oiynshyqsha" oinap, qoldan qylmystyq is ashyp, qaita-qaita qamatamyn dep qýdalap, sońynda qamaýǵa sheshim qabyldaǵanyn kórgende meniń basqa amalym qalmady. Ádildikti óz ómirimnen de artyq kórdim, qidym! Sizderden ádildik úshin kúresýge kómek suraimyn. Endi shyndyqty, aqiqatty esh qoryqpai ashyp aitýǵa bolady!" — delingen jazbada.
Móldir Bekeeva ústinen qylmystyq is qozǵalýǵa sebep bolǵan shýly aýdiojazbaǵa qatysty da túsinikteme berip ótti.
Ol jelide taraǵan aýdionyń jala ekenin aityp otyr.
Al aýdiodaǵy daýys iesi — Maqsat esimdi qyzmetkeri ózin sol kezdegi Politsiia departamentiniń bastyǵymen bailanysyń bar dep, qaralap keldi dep otyr. Bekeeva óziniń páktigin dáleldeý úshin kez kelgen tekserýge daiynmyn deidi.
"Bul — baryp turǵan kiberbýlling, kesip-kesip arnaiy tehnikalyq óńdeýden ótkizip, montajdap, sońynda meni "qubyjyq" etip kórsetken.
Shyntýaitynda, bul "Maqsat" esimdi qyzmetker jaýapkershilik pen saýattan jurdai, aptalap jumysqa kelmeidi. "Qaida júrsiń" dep surasań, meni kep balaǵattap, "meniń "krysham", seniń "kryshańnan" áldeqaida myqtyraq" dep, tipti sol kezdegi departament bastyǵy "E. Jumahanbetovtyń naqsúierisiń, j*lebisiń", — dep esh negizsiz qaralaityn.
Ózimniń arym men tazalyǵymdy dáleldeý úshin tipti kez kelgen ginekolog-ekspertizaǵa da barýǵa daiynmyn!" — dep jazdy Móldir Bekeeva.
Baspasóz hatshysy bul aýdiojazba úshin ózine qol salmas buryn bar shyndyqty Politsiia departamentiniń qazirgi bastyǵy Qairat Dálbekovke aityp, ishinara tártiptik júiede sheshpek bolǵan.
"Biraq general myrza meni tyńdaǵysy da kelgen joq! "Ornyńnan alyp, qylmystyq is qozǵatamyz" dedi. Sodan tergeý jónindegi orynbasary qaita-qaita habarlasyp, Anyqtaý basqarmasynyń bastyǵy habarlasyp, bilik ókilin qorlaý bab boiynsha is qozǵaldy. Qaita-qaita qamatamyz degeni nesi? Sonda ádildik qaida? Buǵan qalai tózýge bolady? Qyzmet ornym úshin. Eki ai boiǵy qysym men qýdalaý shegine jetti! Ústimnen is qozǵaldy, endi jazyqsyz qamalyp ketkenshe — ólgen artyq ekenin túsindim, ózime qol saldym", – deidi ol.
Móldir Bekeevanyń málimdeýinshe, qalalyq Politsiia departamentiniń basshysy aýysqaly beri komandalyq aýys-túiis ornap, keibir qyzmetkerlerden maza qashqan. Alaida Ishki ister ministri Politsiia departamentiniń bastyǵyna tek sógis berip shekteldi dep otyr. Onyń jazýynsha, Shymkenttiń bas politseiiniń artynda "myqty" adamdar bar.
"Komandalyq" kóshý, "shái-maiǵa" jinaý degendi múldem estimegenmin! Al Dálbekov kelgennen keiin, "shai-maiǵa" jeke quramnan jinaimyz" degen sózin Antikor jedel beinejazba arqyly dáleldep berdi emes pe?
"Komandasymen" kóship kep, jemqorlyqqa jol berip otyrǵan generalǵa tek "sógis" berýmen shektelgendi qalai túsinýge bolady? Nege áli qyzmet ornynda departamentti basqaryp otyr? Endi kep maǵan qatysty júrip jatqan tergeý amaldaryna qysym jasap, aralassa ne bolady? Sebebi qazirgi kezde tergeý amaldary júrip jatqanyna qaramai, istiń aq-qarasy anyqtalmai jatyp, Ishki ister ministrliginiń ózi meniń aitqandarymdy joqqa shyǵaryp, tipti onysyn BAQ-qa taratty. Men endi IIM-ne de senbeimin!" — dep jazdy ol.
Bir ólimnen aman qalǵan ol endi tek óz ómiri úshin ǵana emes, jaqyndary úshin de alańdaimyn deidi.
Eldiń aldynda aqiqatty aityp otyryp, qazir ózimniń ǵana emes, jaqyndarymnyń da ómir qaýipsizdigi úshin alańdaimyn. Konstitýtsiianyń kepili — Prezidentimizdiń ózi qatań baqylaýǵa alýyn ótinip, suraimyn!" — delingen jazbada.
Aita ketelik, sáýir aiynyń 5-inde Shymkent qalalyq Politsiia departamenti baspasóz qyzmetiniń jetekshisi Móldir Bekeeva jumystan ketý týraly aryz jazǵan soń sýitsid jasap, ómirimen qoshtaspaq boldy. Ol mundai qadamǵa barýyna basshylyqty kinálap, ary qarai shydai almaitynyn aityp hat jazǵan.
Hatta óziniń ústinen qylmystyq istiń qozǵalǵanyn atap ótken. Bul is áleýmettik jelide paida bolǵan shýly aýdiojazbadan soń qozǵalǵan. Onda baspasóz hatshysy delingen adamnyń qyzmetkerine bylapyt jáne ar-namysqa tietin sózderdi toqtaýsyz aitqanyn estýge bolady.
