Qazaqstan suiytylǵan munai gazyn syrtqa shyǵarýǵa salǵan tyiymdy taǵy alty aiǵa sozbaqshy, dep habarlaidy Dalanews.kz.
"Ishki naryqty suiytylǵan gazben qamtamasyz etý maqsatynda Qazaqstan Respýblikasy Energetika ministriniń mindetin atqarýshy 2024 jylǵy 2 mamyrdaǵy №185 buiryǵymen Qazaqstan Respýblikasynyń aýmaǵynan suiytylǵan munai gazyn avtomobil jáne temirjol kóligimen áketýge alty ai merzimge tyiym salý engizilgen bolatyn. Búgingi tańda QR Energetika ministrligi atalǵan sharany taǵy 6 aiǵa uzartý josparlanyp otyr. Tiisti buiryq jobasy "Ashyq NQA" portalyna ornalastyryldy" delingen 9 qazanda Energetika ministrligi jariialaǵan habarlamada.
Tómendegidei jaǵdailarda bul tyiymnyń kúshi bolmaidy:
1) ónimdi bólý týraly kelisim (kelisimshart) ne Qazaqstan Respýblikasynyń Prezidenti bekitken jer qoinaýyn paidalanýǵa arnalǵan kelisimshart sheńberinde óndirýdi júzege asyrǵan, "Salyq jáne biýdjetke tólenetin basqa da mindetti tólemder týraly" Qazaqstan Respýblikasy Kodeksiniń (Salyq kodeksi) 722-babynyń 1-tarmaǵyna sáikes salyq rejiminiń turaqtylyǵyna ie jer qoinaýyn paidalanýshylardyń áketýine;
2) Qazaqstan Respýblikasynyń halyqaralyq sharttary negizinde Qarashyǵanaq ken ornynda óndirilgen qazaqstandyq shikizattan jasalǵan (óńdelgen) taýarlardy áketýine;
3) Qazaqstan Respýblikasynyń sheginen tys jerde bastalyp, aiaqtalatyn tranzittik tasymalǵa ruqsat.
Buiryq bekitilgen jaǵdaida suiytylǵan munai gazyn syrtqa shyǵarýǵa salynatyn tyiym 2024 jyldyń 14 qarashasynan bastap qoldanysqa enedi.
