Baiqońyr ǵarysh ailaǵynan ushyrylýy tiis "Suńqar" ("Soiýz-5") zymyran tasyǵyshynyń alǵashqy synaq ushyrylymy taǵy da keiinge shegerildi. Qazir zymyrandy 13–16 sáýir aralyǵynda ushyrý josparlanyp otyr, dep habarlaidy Dalanews.kz.
Mamandardyń aitýynsha, ushyrý merziminiń shegerilýine start alańy men zymyran júielerine júrgizilip jatqan qosymsha tehnikalyq tekserister sebep bolǵan.
Barlyq synaq tolyq aiaqtalyp, anyqtalǵan aqaýlar men eskertýler joiylǵannan keiin ǵana Memlekettik komissiia naqty ushyrý kúnin bekitedi.
Qazir zymyrannyń ushyrylym aldyndaǵy daiyndyq jumystary jalǵasyp jatyr. 31 naýryz kúni "Soiýz-5" júktiń maketimen birge №42 montajdaý-synaq kesheninen shyǵarylyp, №45 alańdaǵy ushyrý qondyrǵysyna tik kúide ornatylǵan. Bul – daiyndyq jumystarynyń sońǵy kezeńi bastalǵanyn bildiredi.
Aita keteiik, atalǵan joba Qazaqstan men Resei birlesip júzege asyryp jatqan "Báiterek" baǵdarlamasy aiasynda qolǵa alynǵan. Baǵdarlama 2004 jyly bastalyp, 2005 jyly resmi túrde iske qosylǵan. Jobanyń negizgi maqsaty – Baiqońyrda "Soiýz-5" zymyrandaryna arnalǵan zamanaýi ushyrý keshenin salý.
Degenmen joba birneshe ret keiinge shegerildi. Alǵashynda zymyrandy 2023 jyly ushyrý kózdelse, keiin merzim 2025 jylǵa, odan soń 2026 jyldyń basyna aýystyrylǵan.
Jaýapty ministrliktiń málimetinshe, jobanyń jalpy quny 90,8 mlrd teńgeni quraidy. Onyń 81,3 mlrd teńgesi qazirdiń ózinde igerilgen.
