بايقوڭىر عارىش ايلاعىنان ۇشىرىلۋى ءتيىس "سۇڭقار" ("سويۋز-5") زىمىران تاسىعىشىنىڭ العاشقى سىناق ۇشىرىلىمى تاعى دا كەيىنگە شەگەرىلدى. ءقازىر زىمىراندى 13–16 ءساۋىر ارالىعىندا ۇشىرۋ جوسپارلانىپ وتىر، دەپ حابارلايدى Dalanews.kz.

مامانداردىڭ ايتۋىنشا، ۇشىرۋ مەرزىمىنىڭ شەگەرىلۋىنە ستارت الاڭى مەن زىمىران جۇيەلەرىنە جۇرگىزىلىپ جاتقان قوسىمشا تەحنيكالىق تەكسەرىستەر سەبەپ بولعان.

بارلىق سىناق تولىق اياقتالىپ، انىقتالعان اقاۋلار مەن ەسكەرتۋلەر جويىلعاننان كەيىن عانا مەملەكەتتىك كوميسسيا ناقتى ۇشىرۋ كۇنىن بەكىتەدى.

ءقازىر زىمىراننىڭ ۇشىرىلىم الدىنداعى دايىندىق جۇمىستارى جالعاسىپ جاتىر. 31 ناۋرىز كۇنى "سويۋز-5" جۇكتىڭ ماكەتىمەن بىرگە №42 مونتاجداۋ-سىناق كەشەنىنەن شىعارىلىپ، №45 الاڭداعى ۇشىرۋ قوندىرعىسىنا تىك كۇيدە ورناتىلعان. بۇل – دايىندىق جۇمىستارىنىڭ سوڭعى كەزەڭى باستالعانىن بىلدىرەدى.

ايتا كەتەيىك، اتالعان جوبا قازاقستان مەن رەسەي بىرلەسىپ جۇزەگە اسىرىپ جاتقان "بايتەرەك" باعدارلاماسى اياسىندا قولعا الىنعان. باعدارلاما 2004 جىلى باستالىپ، 2005 جىلى رەسمي تۇردە ىسكە قوسىلعان. جوبانىڭ نەگىزگى ماقساتى – بايقوڭىردا "سويۋز-5" زىمىراندارىنا ارنالعان زاماناۋي ۇشىرۋ كەشەنىن سالۋ.

دەگەنمەن جوبا بىرنەشە رەت كەيىنگە شەگەرىلدى. العاشىندا زىمىراندى 2023 جىلى ۇشىرۋ كوزدەلسە، كەيىن مەرزىم 2025 جىلعا، ودان سوڭ 2026 جىلدىڭ باسىنا اۋىستىرىلعان.

جاۋاپتى مينيسترلىكتىڭ مالىمەتىنشە، جوبانىڭ جالپى قۇنى 90،8 ملرد تەڭگەنى قۇرايدى. ونىڭ 81،3 ملرد تەڭگەسى ءقازىردىڭ وزىندە يگەرىلگەن.