Qazaq qyzy Sábina Altynbekovany ázir kúlli álem tanidy. Suńǵaq boily sulýdyń symbaty qalyń qytai halqyn shalqasynan túsirdi. Voleibolshy qyzdyń áleýmettik jelidegi bir ǵana videosynyń ózi 2 mln. kórermen jinaǵan eken. Voleiboldan Qytai jerinde ótken Aziia birinshiligi sulý Sábinanyń baǵyn ashty desek6 durysyraq bolar. 17 jasar boijetken aldymen búkil Qytai jurtyna, artynsha alty qurlyqqa tanyldy. Biz Sábinany jattyǵý zalynan taptyq.
– Sálem, Sábina.
– Sálem. Sizder qai gazetten keldińizder?
– «Qala men Dala» gazeti.
– Shynymdy aitsam, sońǵy kezderi suhbat berýden qolym bosamai ketti (kúlip). Eshkimniń kóńilin qaldyrǵym kelmeidi. Minezim jumsaq.
– Sábina, ainalasy bir aptanyń ishinde seni aidai álem tanydy. Baqyttan basyń ainalyp júrgen joq pa?
– Qyzyq suraq eken. Óz basym tanymaldylyqqa umtylǵan joqpyn. Qytai halqy anime-mýltfilmderdi qatty jaqsy kóretinge uqsaidy. Meni sol týyndylardyń keiipkerine uqsatty.
– Boidaq jigitterdi seniń basyń bos pa, joq pa degen suraq qyzyqtyrady...
– Jigitim joq. Óz basym ázir eshqaida asyqpaimyn. Turmysqa shyǵý týraly máseleni de kezi kelgende oilanarmyn. Al ázir... kúnine 2 márte, 2,5-3 saǵat jattyǵamyn. Kózdegen maqsatym bar. Soǵan jetkim keledi. Al ózge dúnieni keiin shegere turamyn.
ÁLEMDIK BASPASÓZ SÁBINA TÝRALY NE DEIDI?
«Onyń basty jetistigi - sulýlyǵy. Bul ekzotikalyq aziialyq keskindegi uzyn, symbatty, kózderi erekshe úlken sportshy qyz komikstardan shyǵyp, voleibol oinaýǵa kirisken adam siiaqty».
Qytailyq China daily, «Jenmin Jibao» siiaqty basylymdar Sábinaǵa dál osyndai baǵa berdi.
...
«Aziiada internet-sensatsiia bolǵan Altynbekovanyń tanymaldyǵy ózine kedergi bolady. On toǵyz jasqa deiingi voleibolshylar arasynda ótken Aziia chempionatynda búkil el-jurttyń nazary tek Sábina Altynbekovaǵa qadaldy. Oiyn alańynda odan basqa adam joq sekildi áser týyndady».
Amerikalyq Sport lllustrated, Sporting News basylymdary da Sábinanyń sulýlyǵyna tánti boldy.
– Qazir áleýmettik jelide Sábinaǵa qandai jigitter unaidy degen forýmdar da qurylyp jatyr. Buǵan ne dep jaýap berer ediń?
– Talabym qatań. Árine, ázil. Birinshiden, súigenimniń boiy uzyn bolǵany kerek. Jaqsy tárbie alǵany, jaman ádetten aýlaq ári sportqa jany jaqyn bolǵany mańyzdy. Sosyn...óziniń aldyna maqsat qoia biletin jáne soǵan qol jetkizýge tyrysatyn tabandy jan bolǵanyn qalaimyn.
– Rasymen de, mektepti bitirgeniń biyl ǵana. Aldaǵy oi-armanyń týraly aityp berseń.
– Iá, respýblikalyq olimpiadalyq rezerv daiyndaityn sport mektebin támamdadym. Al qazir ál-Farabi atyndaǵy QazUÝ-dyń deneshynyqtyrý fakýltetine qujat tapsyryp qoidym. Sporttan alystaǵym joq. Sport men úshin árdaiym birinshi orynda.
– Kópshilik seniń ósken orta, otbasy – oshaq qasyń týraly bilgisi keledi.
– Úide bes adambyz. Áke-sheshem úsh qyzdy tárbielep ósirdi. Ózim ortanshysymyn. Apaiym Astanadaǵy Gýmilev atyndaǵy ýniversitetti «qyzyl diplommen» támamdady. Al sińlim áli kishkentai, 4- jasta. Biraq onyń da voleibol oiynyna qyzyǵýshylyǵy bar.
– Al óziń valeibolǵa qai jasyńnan bastap qyzyqtyń?
– Besinshi synypta oqyp júrgende boiymnyń uzyndyǵyna qarap basketbol komandasyna shaqyrdy. Alaida, óz basym voleiboldy qaladym. Jáne biz úshin (qyzdardy aitamyn) jarasymdy oiyn. Onyń ústine sheshem de jas kezinde voleibolǵa qyzyqqan, kishkentai kezimde sheshemniń voleibol jeidesin kiip túsken sýretterin kórip qyzyǵatynmyn. Bastapqyda ánsheiin qyzyǵýshylyq boldy. Keiinnen kásibi deńgeige kóshýge yqylas týdy. Almatyda turyp jatqanyma biyl ekinshi jyl. Qazir Joǵara ligada «Almaty» klýbynda oinaimyn. Áý basta ata-anam quptamady. Olar meniń zańger bolǵanymdy qalady. Biraq, ózim sportpen ainalysqym keldi.
Áńgimelesken, Aiaýlym ShAIMARDAN
