قازاق قىزى ءسابينا التىنبەكوۆانى ءازىر كۇللى الەم تانيدى. سۇڭعاق بويلى سۇلۋدىڭ سىمباتى قالىڭ جۇڭگو حالقىن شالقاسىنان ءتۇسىردى. ۆولەيبولشى قىزدىڭ الەۋمەتتىك جەلىدەگى ءبىر عانا ۆيدەوسىنىڭ ءوزى 2 ملن. كورەرمەن جيناعان ەكەن. ۆولەيبولدان جۇڭگو جەرىندە وتكەن ازيا بىرىنشىلىگى سۇلۋ ءسابينانىڭ باعىن اشتى دەسەك6 دۇرىسىراق بولار. 17 جاسار بويجەتكەن الدىمەن بۇكىل جۇڭگو جۇرتىنا، ارتىنشا التى قۇرلىققا تانىلدى. ءبىز ءسابينانى جاتتىعۋ زالىنان تاپتىق.
– سالەم، ءسابينا.
– سالەم. سىزدەر قاي گازەتتەن كەلدىڭىزدەر؟
– «قالا مەن دالا» گازەتى.
– شىنىمدى ايتسام، سوڭعى كەزدەرى سۇحبات بەرۋدەن قولىم بوساماي كەتتى (كۇلىپ). ەشكىمنىڭ كوڭىلىن قالدىرعىم كەلمەيدى. مىنەزىم جۇمساق.
– ءسابينا، اينالاسى ءبىر اپتانىڭ ىشىندە سەنى ايداي الەم تانىدى. باقىتتان باسىڭ اينالىپ جۇرگەن جوق پا؟
– قىزىق سۇراق ەكەن. ءوز باسىم تانىمالدىلىققا ۇمتىلعان جوقپىن. جۇڭگو حالقى انيمە-مۋلتفيلمدەردى قاتتى جاقسى كورەتىنگە ۇقسايدى. مەنى سول تۋىندىلاردىڭ كەيىپكەرىنە ۇقساتتى.
– بويداق جىگىتتەردى سەنىڭ باسىڭ بوس پا، جوق پا دەگەن سۇراق قىزىقتىرادى...
– جىگىتىم جوق. ءوز باسىم ءازىر ەشقايدا اسىقپايمىن. تۇرمىسقا شىعۋ تۋرالى ماسەلەنى دە كەزى كەلگەندە ويلانارمىن. ال ءازىر... كۇنىنە 2 مارتە، 2،5-3 ساعات جاتتىعامىن. كوزدەگەن ماقساتىم بار. سوعان جەتكىم كەلەدى. ال وزگە دۇنيەنى كەيىن شەگەرە تۇرامىن.
الەمدىك باسپا ءسوز ءسابينا تۋرالى نە دەيدى؟
«ونىڭ باستى جەتىستىگى - سۇلۋلىعى. بۇل ەكزوتيكالىق ازيالىق كەسكىندەگى ۇزىن، سىمباتتى، كوزدەرى ەرەكشە ۇلكەن سپورتشى قىز كوميكستاردان شىعىپ، ۆولەيبول ويناۋعا كىرىسكەن ادام سياقتى».
قىتايلىق China daily، «جەنمين جيباو» سياقتى باسىلىمدار ءسابيناعا ءدال وسىنداي باعا بەردى.
...
«ازيادا ينتەرنەت-سەنساسيا بولعان التىنبەكوۆانىڭ تانىمالدىعى وزىنە كەدەرگى بولادى. ون توعىز جاسقا دەيىنگى ۆولەيبولشىلار اراسىندا وتكەن ازيا چەمپيوناتىندا بۇكىل ەل-جۇرتتىڭ نازارى تەك ءسابينا التىنبەكوۆاعا قادالدى. ويىن الاڭىندا ودان باسقا ادام جوق سەكىلدى اسەر تۋىندادى».
امەريكالىق Sport lllustrated، Sporting News باسىلىمدارى دا ءسابينانىڭ سۇلۋلىعىنا ءتانتى بولدى.
– ءقازىر الەۋمەتتىك جەلىدە ءسابيناعا قانداي جىگىتتەر ۇنايدى دەگەن فورۋمدار دا قۇرىلىپ جاتىر. بۇعان نە دەپ جاۋاپ بەرەر ەدىڭ؟
– تالابىم قاتاڭ. ارينە، ءازىل. بىرىنشىدەن، سۇيگەنىمنىڭ بويى ۇزىن بولعانى كەرەك. جاقسى تاربيە العانى، جامان ادەتتەن اۋلاق ءارى سپورتقا جانى جاقىن بولعانى ماڭىزدى. سوسىن...ءوزىنىڭ الدىنا ماقسات قويا بىلەتىن جانە سوعان قول جەتكىزۋگە تىرىساتىن تاباندى جان بولعانىن قالايمىن.
– راسىمەن دە، مەكتەپتى بىتىرگەنىڭ بيىل عانا. الداعى وي-ارمانىڭ تۋرالى ايتىپ بەرسەڭ.
– ءيا، رەسپۋبليكالىق وليمپيادالىق رەزەرۆ دايىندايتىن سپورت مەكتەبىن ءتامامدادىم. ال ءقازىر ءال-فارابي اتىنداعى قازۇۋ-دىڭ دەنەشىنىقتىرۋ فاكۋلتەتىنە قۇجات تاپسىرىپ قويدىم. سپورتتان الىستاعىم جوق. سپورت مەن ءۇشىن ءاردايىم ءبىرىنشى ورىندا.
– كوپشىلىك سەنىڭ وسكەن ورتا، وتباسى – وشاق قاسىڭ تۋرالى بىلگىسى كەلەدى.
– ۇيدە بەس ادامبىز. اكە-شەشەم ءۇش قىزدى تاربيەلەپ ءوسىردى. ءوزىم ورتانشىسىمىن. اپايىم استاناداعى گۋميليەۆ اتىنداعى ۋنيۆەرسيتەتتى «قىزىل ديپلوممەن» ءتامامدادى. ال ءسىڭلىم ءالى كىشكەنتاي، 4- جاستا. ءبىراق ونىڭ دا ۆولەيبول ويىنىنا قىزىعۋشىلىعى بار.
– ال ءوزىڭ ۆالەيبولعا قاي جاسىڭنان باستاپ قىزىقتىڭ؟
– بەسىنشى سىنىپتا وقىپ جۇرگەندە بويىمنىڭ ۇزىندىعىنا قاراپ باسكەتبول كومانداسىنا شاقىردى. الايدا، ءوز باسىم ۆولەيبولدى قالادىم. جانە ءبىز ءۇشىن (قىزداردى ايتامىن) جاراسىمدى ويىن. ونىڭ ۇستىنە شەشەم دە جاس كەزىندە ۆولەيبولعا قىزىققان، كىشكەنتاي كەزىمدە شەشەمنىڭ ۆولەيبول جەيدەسىن كيىپ تۇسكەن سۋرەتتەرىن كورىپ قىزىعاتىنمىن. باستاپقىدا انشەيىن قىزىعۋشىلىق بولدى. كەيىننەن كاسىبي دەڭگەيگە كوشۋگە ىقىلاس تۋدى. الماتىدا تۇرىپ جاتقانىما بيىل ەكىنشى جىل. ءقازىر جوعارا ليگادا «الماتى» كلۋبىندا وينايمىن. ءاۋ باستا اتا-انام قۇپتامادى. ولار مەنىڭ زاڭگەر بولعانىمدى قالادى. ءبىراق، ءوزىم سپورتپەن اينالىسقىم كەلدى.
اڭگىمەلەسكەن، اياۋلىم شايماردان
