Búgin qala ákimi Baqyt Sultanov pen «Otandastar» qorynyń prezidenti Nurtai Abyqaev ózara yntymaqtastyq týraly memorandýmyna qol qoidy.
Taraptar elge kóship kelgen etnikalyq qazaqtarǵa qoldaý kórsetýge kelisti. Qala ákimi Baqyt Sultanov «Otandastar» qoryn astanada qoǵamdyq-mádeni sharalardy birlesip ótkizýge shaqyrdy.
«Elbasynyń tapsyrmasymen «Otandastar qory» qurylyp, ózińizdiń basshylyǵyńyzben aýqymdy ári mańyzdy jumystar júrgizilýde. Atap aitqanda, alys jáne jaqyn shetelderden qonys aýdarǵan otandastarymyzǵa quqyqtyq, aqparattyq, rýhani, psihologiialyq, tildik kómekter kórsetý sharalary qabyldanyp otyr. Bul rette, jerlesterimizdiń jańa ortaǵa kirigip, qoǵamdyq ómirge erkin aralasýyna múmkindik jasaý mańyzdy sanalady. Ózderińizge málim, 2019 jyl – Jastar jyly dep jariialandy. Onyń aiasynda biz «Otandastar» qoryn astanada qoǵamdyq-mádeni sharalardy birlesip ótkizýge shaqyramyz», – dedi Baqyt Sultanov.
Ákimniń aitýynsha, Nur-Sultan qalasyna kelgen etnikalyq qazaqtardyń qoǵamǵa beiimdelýine jáne yqpaldasýyna kómektesý maqsatynda úkimettik emes uiym ókilderi arnaiy jobalardy júzege asyrady dep josparlanýda.
«Elorda kúni qarsańynda «Otandastar» qorymen birlesip «Qasietti qazaq eli» Halyqaralyq festivalin uiymdastyramyz. Sonymen qatar, qazaq qoldanbaly ónerin damytýǵa jáne nasihattaýǵa arnalǵan «Qazaq sáni» is-sharasy ótkiziletin bolady. Osy baǵyttaǵy jumystar Elbasynyń «Rýhani jańǵyrý» jáne «Uly dalanyń 7 qyry» baǵdarlamalary aiasynda da jalǵasyn tabatyn bolady», – dedi ákim.
«Otandastar» qorynyń prezidenti Nurtai Abyqaev qordyń qyzmeti men basty maqsattary týraly aityp berdi.
Onyń málimetine qaraǵanda, bolashaqta osyndai memorandým basqa da aimaqtarmen jasalatyn bolady. Eske salaiyq, 2017 jyly Dúniejúzi qazaqtarynyń V quryltaiynda Qazaqstan Prezidenti Nursultan Nazarbaevtyń tapsyrmasymen shettegi jáne elge kóship kelgen aǵaiyndardy qoldaý úshin «Otandastar» qory qurylǵan bolatyn.
Basty baǵytynyń biri – bilim berý.
https://youtu.be/nlYpQYCGBtY
