Aqtóbe oblysynda "100 bas jylqy urlady" degen aiyppen 7 jylǵa sottalǵan 60 jastaǵy Rahat Sársenov apelliatsiialyq sot sheshimimen bostandyqqa shyqty. Bul is qoǵam nazaryn aýdartyp, jelide qyzý talqylandy, dep habarlaidy dalanews.kz.
Keiinirek jýrnalist Rýslan Ótepbai Rahat Sársenovti 2019 jyly burynǵy jumys berýshisi notariýsqa aparyp, jalǵyz baspanasyn kepilge qoiǵyzǵanyn, endi olar dalada qalýy múmkin ekenin málimdedi.
Osy jańalyqtan keiin jergilikti kásipker olarǵa baspana syilaǵan.
"Rahat Sársenovtiń otbasyna jergilikti kásipker Aqtóbe qalasynan baspana syilady. "Jumysymnan kórmegen jaqsylyqty halyqtan kórdim" dep, Rahat ata kóz jasyna erik berdi. Qiyn sátte qoldaý kórsetken kásipkerge jáne barsha qazaq eline Alla razy bolsyn! Al iske keler bolsaq, zańgerlik jumystar bastalyp ketti. Qajet aryzdar daiyndalyp, quqyqtyq turǵyda kúres jalǵasyp jatyr", - dep jazdy Rýslan Ótepbai jelidegi paraqshasynda.
