Keshe, 2025 jylǵy 7 qazanda áleýmettik jelide Pavel Dýrovtyń Almaty oblysyndaǵy Kólsai kólinde muzdai sýǵa shomylǵan sátiniń videosy tarady. Alaida 40 jastaǵy Telegram-nyń negizin qalaýshy bul áreketimen Qazaqstan zańyn buzǵanyn ańdamai da qalǵan syńaily. Esesine, onyń bul bilmestigi úshin ulttyq tabiǵi parkiniń qyzmetkerleri jazalanatyn boldy, dep jazdy Dalanews.kz.
Aldymen jelidegi qyzý talqylanyp jatqan videoǵa qatysty "Kólsai kólderi" memlekettik ulttyq tabiǵi parkiniń ákimshiligi málimdeme jasady:
"Buqaralyq aqparat quraldary men áleýmettik jelilerde "VKontakte" jáne Telegram messendjeriniń negizin qalaýshy Pavel Dýrovtyń Almaty oblysyndaǵy "Kólsai kólderi" ulttyq tabiǵi parkinde muzdai sýda shomylǵan sáti túsirilgen video taraýda. Osyǵan bailanysty biz Kólsai kólderinde shomylý týristik marshrýttyń tólqujatyna sáikes qatań túrde tyiym salynatynyn eskertemiz. Atalǵan jaǵdaiǵa bailanysty park basshylyǵy qyzmettik tekseris bastady. Onyń qorytyndysy boiynsha tiisti baqylaýdy qamtamasyz etpegen jaýapty qyzmetkerlerge tártiptik sharalar qoldanylady".
Keiinnen TASS agenttiginiń resmi saýalyna da jaýap bergen mekeme zańdy buzǵan Pavel Dýrovtyń ózine aiyppul salynbaitynyn naqtylap, ony bylai túsindirgen:
"Biz ony oqiǵa ornynan ustap alǵan da, kórgen de joqpyz. Ony qalai syrttai jazalaimyz? Onyń ústine ol Qazaqstan azamaty emes...".
Al tanymal kásipkerdi Kólsaiǵa shomylýyna ruqsat bergen saiabaq qyzmetkerlerine qandai tártiptik sharalar qoldanylatyny belgisiz. Bir belgilisi, shynymen de mundaǵy kólge sýǵa túsýge tyiym salynyp, ony buzǵandarǵa aiyppul qarastyrylatyny. Al aiyppul kólemi 10 ailyq eseptik kórsetkishti quraidy, iaǵni 39 320 teńge.
