Jýrnalistermen ótken onlain kezdesýde sýdia ózi týraly álemjelide taraǵan aqparatty feik dep atap, ofisinen tabylǵan 10 myń dollardyń “shyǵý tegin” túsindirip berdi.
Onyń atap ótkenindei álgi qarajat óz jinaǵy, onyń ózinde tutas emes. Qarjynyń teń jartysyn qaryzǵa alǵan.
“Túrkisb aýdanynda turatyn sheshemniń úiin satyp, onyń ústinen az-muz aqsha qosyp, tap janymnan páter satyp alýdy uiǵarǵanbyz. Sol kúni Otbasy bankke barýdy oilastyryp, alǵashqy jarnany aýdarý úshin aqshany jumysqa alyp kelgen jaiym bar edi”, – deidi Jolmanova.
“Myna zamanda aqshany jumysta saqtaýshy ma edi?” degen jýrnalister saýalyna sýdia qomaqty qarajatty úide saqtaýdan seziktengenin, balalardyń, kelimdi-ketimdi adamnyń kózine túsip joǵalyp keterinen qaýiptengenin aitty.
Sot qyzmeti qaýyrt bolǵasyn tańnan qara keshke deiin úi betin kórmeitin kezder kóp.
“Sondyqtan aqshany úide ustaǵandy jón kórmedim. Úige tamaq tasityn kýrerler jii keledi. Beisaýat júrgen bireýdiń kózine tússe aqshadan buryn, otbasym sorlap qalar edi”, – deidi sýdia.
…
Jolmanovanyń budan ózge kapitaly joq. Million dollar týraly álemjelige áp-sátte tarap ketken aqparat – daqpyrt. Páterin tintigender quralaqan oralǵan.
Sói degen sýdia kóligi joq ekenin alǵa tartty. Al seiften tabylǵan 10 myń dollar urlyq emes. Qalai, qaidan kelgenin uǵyndyryp berýge daiar.
“Kóligi men páterinen bir qap aqsha tabyldy dep urandatqandar osy arqyly máseleniń mán-jaiynan habarsyz halyqty maǵan qarsy qoimaq boldy. Men ǵana emes, tutas sot salasyna kir keltirýdi kózdedi”, – deidi ol.
…
Jolmanova sottyń sanktsiiasynsyz jáne Bas prokýrordyń buiryǵynsyz úiin tintimek bolǵan tergeýshiler zańdy belden basty dep sanaidy. Aitýynsha tergeýshi top sýdianyń úide joǵyn bile tura, baspananyń astań-kesteńin shyǵarýdy kózdegen.
“Úiimdi tintigeli jatqanyn estip, álgi jerde shý kóterdim. Bosaǵaǵa ótip úlgeripti. Kabinetimdi aqtaryp bolǵannan keiin meniń kózimshe úidi qoparýǵa kóshti. Túk tappady”, – deidi Jolmanova.
…
Kabinetindegi 10 myń dollar adal aqysy ekenin, jeke kóligi joǵyn, al úiin tintigender quralaqan qaitqanyn málim etken sýdiaǵa qandai aiyp taǵylyp otyr?
Dalanews.kz tilshisi máseleniń anyq-qanyǵyn sýdianyń ózinen surastyrdy.
Jolmanova óziniń kúdikti emes, kýáger ekenin aitady. Qylmystyq is qozǵalmapty. Ózine qatysty qandai kompromat barynan habarsyz. Onyń tintý kezinde de, ázir de bostandyqta júrgeni sodan bolsa kerek.
Budan buryn birqatar BAQ: “Jolmanova qurylys kompaniiasynan million dollarǵa jýyq para aldy” degen aqparat taratqan-dy. Sýdia muny joqqa shyǵaryp otyr.
“Qurylys kompaniiasynan kók tiyn alǵan emespin. Moiyndaiyn, osyǵan deiin qurylys salasymen bailanysty birqatar daýly dúniemen istes bolǵanym ras.
Máselen “Esentai sitidiń” daýy. Turǵyndardyń shaǵymyn zańdy dep tanyp, aýqymy keńeiip jatqan turǵyn-úi kesheniniń kesirinen aýlasyna óte almai qalǵan azamattardy aqtap shyqtym. “Eýropolis” turǵyn-úi keshenine aryzdanǵan turǵyndardyń aryz-talabyn eskerip, úidiń qoldanysqa berilýin zańsyz dep taptym”, – deidi ol.
…
Jolmanova tergeýdi Ulttyq qaýipsizdik komiteti júrgizip jatqanyna ań-tań. Zańǵa sai korrýptsiia men alaiaqtyq isterdi UQK tergemeidi. Munymen Sybailas jemqorlyqqa qarsy agenttik nemese politseiler ainalysýy tiis.
“UQK-nyń mende ne jumysyn baryn ary oilanyp, beri oilanyp baiybyna bara almai-aq qoidym. Bilsem bul istiń basy-qasynda Toibaev Sultan deitin komitet ókili júr. Almaty qalalyq soty tóraǵasynyń keńesshisi qyzmetin qosa atqarady. Túnekúngi atyshýly sýretti jelige taratyp jibergen de naq osy - Toibaev”, – deidi sýdia.
…
Ilgeride sot immýniteti týraly sóz qozǵaǵanbyz. Naqtylasaq, sýdialar sot biligin júzege asyrýshy tulǵa retinde birqatar normativtik aktilermen, sonyń ishinde QR Konstitýtsiiasymen jəne konstitýtsiialyq zańdarmen aiqyndalǵan arnaiy mərtebege ie.
– Alaida, – deidi Jolmanova. Meni bir jyl boiy toryp kelgen eken. Kabinetime jasyryn kamera ornatyp, kirgen-shyqqanymdy ańdyp otyrǵan. Muny bir top adam kabinetime saý etip kirgen kúni bir-aq bildim. Tipti keńesý bólmesine de kamera ornatqan.
Aitýynsha osylaisha onyń sýdialyq immýniteti tabanǵa taptalǵan. Keńesý bólmesi ádette sýdianyń isti ábden zerdelep, aqyrǵy sheshim shyǵaratyn orny. Arnaiy mártebege sai sýdia táýelsiz tulǵa, onyń quqyǵyna qol suǵýǵa jol berilmeidi.
Sói degen Jolmanova “maǵan kepildik berilgen immýnitet ádiram qaldy”, – deidi.
…
Dalanews.kz tilshisin tańǵaldyrǵan taǵy bir jait – quryqtaý kezinde Jolmanovanyń telefonyn aqtaryp, alańsyz otyrǵany. Muny qalai túsinemiz?
“Túsinbeitin nesi bar? Men ózimniń adaldyǵyma, tazalyǵyma senimdimin. Qobaljyǵan joqpyn. “Sanktsiiamen keldik” degenderdi kabinetime kirgizdim, tintý júrgizýge erik berdim. Sol sátte telefonyma tynym bolmai, alań kóńil áriptesterim habar-oshar surai bastady. Solarǵa jaýap jazǵan sát sýretke túsip qalsa kerek”, – deidi Jolmanova.
Osy sátte uly habarlasyp, bir top adamnyń esik aýzynda turǵanyn jetkizgen. Jolmanova shý kóterip, ózi joqta úidi tintýge kelgenderdiń áreketi zańsyz ekenin aitqan.
…
Atalǵan istiń ajiotajǵa ulasýyna bloger Aigúl Orynbektiń jazbasy aitarlyqtai áser etkeni anyq.
Blogerdiń jazbasynda Jolmanovanyń kabinetinen 4500 dollar, úiin tintý kezinde 2 800 000 dollar, jeke kóliginen 600 000 dollar tabylǵany aitylǵan-tyn. Sondai-aq Medeý aýdandyq sotynyń sýdiasy qurylys salýshydan 1 180 000 dollar kóleminde para alǵany týraly aqparatty Orynbekten oqyǵan edik.
“Osy ras pa?” degen Dalanews saýalyna “joq” dep jaýap bergen Jolmanova Qazaqstandaǵy Sýdialar odaǵy áriptesiniń ar-namysyn aiaqqa taptatpasyna senimdi.
“Sebebi munyń bári jalǵan. Men qoǵamdyq kólikpen júremin. Máshinem joq. Al úidi tintý kezinde eshteńe tappady”, – deidi ol. Sózine qaraǵanda qazirgi sitýatsiia tolyq sheshimin tapqannan keiin, isi Aigúl Orynbekpen bolmaq.
…
Jolmanova bul istiń qoldan quralǵanyn, qýdalaýdy joǵarydaǵy jetekshileri uiymdastyrǵanyn aitady.
Sýdia “sot júiesiniń tazalyǵy men táýelsizdigin qorǵaǵanym úshin “súikimsiz” atandym” dep sanaidy.
“Medeý aýdandyq sotynyń tóraǵasy Áset Boranbaev pen Almaty qalalyq sotynyń tóraǵasy Asqar Smailovtyń uzaq ýaqyt boiǵy zańsyz is-áreketterine qarsy turdym. Sýdialar sheshimine yqpal etip, qysym kórsetýine kedergi keltirdim.
Aýdandyq sot tóraǵasy bizdiń júktemeni azaityp, qaǵaz-qujattyń azabynan aryltatyn septigin hatshylardy jumystan shyǵara bastady. Árbir sýdianyń hatshysy bolýy kerek.
Bizdiń shuǵyl sheshim shyǵaryp, jumysty jedel júrgizýimiz osy kómekshilerge tirelip tur. Al Boranbaev olarǵa sebepsizden soqtyǵyp, tyrnaq astynan kir izdedi. Saldarynan 6 hatshy jumystan ketti, – deidi Jolmanova.
Sýdia muny aityp, Jaqyn Asanovqa deiin jetken.
“Qalalyq sot tóraǵasy Asqar Smaiylov aýrý asqynyp, karantin kúsheigen shaqta bizderdi jumysqa shyǵýǵa májbúrledi. Sóitip bas sanitardyń qaýlysyn buzdyq. Eki sýdia kovidtan kóz jumdy. Muny kóre otyryp, únsiz qala almadym. Smailovqa hat joldap, eki sýdianyń qaitys bolǵanyn esine saldym. Indet aýa jaiylǵan shaqta qashyqtan jumys isteý qajet ekenin eskerttim. Ashyǵyn aitqanda, oǵan óz pikirimdi bildirgenim úshin jaqpai qaldym”, – deidi Jolmanova.
Qalalyq sot tóraǵasy qyzmetine taǵaiyndalǵan alǵashqy kúnnen sýdialardyń isine kiligýge kóshken. Kónbegenderdi jumystan qýatynyn aitqan.
“Dál solai degen jazbasy bar. Qandai sheshim shyǵarý keregin aityp, iske tumsyq tyǵýyn doǵarǵan joq. Buǵan qarsy shyqqan meni jazalai almady. Sebebi jumysymda min joq edi.
Toq eterin aitqanda, meniń arym da, qolym da taza...”, deidi sýdia Jolmanova.
Ázirlegen, Dýman BYQAI
