Sot úkimin túsindirgen sýdia Zarema Hamidýllina Sultan Sársemálievtiń Naýryzdy qajetti qorǵanys jaǵdaiynda, al qalǵan jábirlenýshilerdi "óz áreketin túsinbei" óltirgeni týraly ýájderi dáleldenbegenin málimdedi. Sondai-aq sot qorǵaýshy taraptyń aiyptalýshy qylmys kezinde affekt jaǵdaiynda boldy degen pikirin qabyldamady, dep habarlaidy "Aq Jaiyq" basylymy.
Sýdianyń aitýynsha, jábirlenýshige keminde on ret pyshaq jaraqaty salynǵan jaǵdaida qajetti qorǵanys týraly sóz qozǵaý múmkin emes. Al máiitti keiin jasyrý áreketi qylmystyń maqsatty túrde jasalǵanyn kórsetedi.
Sot tóraǵasy Naýryzdyń denesi kisi óltirýden keiin on aidan astam ýaqyt ótken soń tabylǵanyn túsindirdi. Máiit qatty shirip ketkendikten, sarapshylar teriniń saqtalǵan bólikterinen on pyshaq jaraqatyn ǵana anyqtai alǵan. Alaida saraptama qorytyndysyna sáikes, jaraqat sany budan áldeqaida kóp bolýy múmkin.
Sonymen qatar qaza tapqan tórt adamnyń da ólimge ákelgen pyshaq jaraqattary júrek tusyna salynǵan. Maqsottyń, Násiptiń jáne Meiramgúldiń qoldary men bilekterinen de jaraqattar tabylǵan. Sottyń qorytyndysy boiynsha, bul olardyń shabýyldaýshydan qorǵanýǵa tyrysqanyn bildiredi.
Sot psihologiialyq-psihiatriialyq saraptama nátijelerine súiendi. Qorytyndyǵa sáikes, Sársemálievtiń aqyl-esi durys, psihikalyq aýrýmen aýyrmaidy jáne qylmys jasaǵan kezde fiziologiialyq ta, patologiialyq ta affekt jaǵdaiynda bolmaǵan.
Sýdia fiziologiialyq affektiniń qysqa merzimdi kúi ekenin, al sottalýshynyń áreketteri birneshe aiǵa sozylyp, birizdi túrde jasalǵanyn atap ótti.
Onyń aitýynsha, Sársemáliev qylmystarǵa aldyn ala daiyndalyp, ár áreketin sanaly túrde jasaǵan. Kisi óltirýge burynǵy áieliniń týystarymen aradaǵy janjal sebep bolǵan.
"Balalaryn oilaǵan áke olardy jetim qaldyrmas edi"
Aiyptalýshyǵa qarata sóilegen sýdia, eger ol jaqsy kúieý ári jaqsy kúieý bala bolǵanda, áieliniń ata-anasy qyzyn óz úilerine alyp ketýge tyryspas edi dep málimdedi.
"Siz Naýryzdy qasaqana óltirdińiz. Al alǵashqy qylmysyńyz áshkerelenip qalady dep qorqyp, otbasynyń basqa múshelerin de ómirden aiyrdyńyz. Siz kinásiz adamdardy óltirdińiz", – dedi Zarema Hamidýllina.
Sýdia sot protsesi barysynda Sársemáliev jábirlenýshilerdiń qandai sózi nemese áreketi mundai qatygez qylmysty aqtai alatynyn túsindire almaǵanyn atap ótti.
Aiyptalýshy qylmystardy balalary úshin jasaǵanyn málimdegen. Alaida sot bul ýájdi negizsiz dep tanydy.
"Balalaryn shyn máninde oilaityn áke olardy eshqashan ata-anasyz qaldyrmas edi. Ol balalarynyń anasyn aýyr psihikalyq dertpen jalǵyz qaldyryp, olardyń bolashaǵyn óz qolymen oirandamas edi", – dedi sýdia.
Onyń aitýynsha, qazir balalar ata-anasynyń janynda emes, memlekettiń qamqorlyǵynda júr. Olarǵa oiynshyq pen tátti emes, ózderi aiyrylyp qalǵan ata-analyq mahabbat pen qamqorlyq qajet.
Sýdia burynǵy áieliniń ata-anasy sottalýshy úshin óziniń áke-sheshesindei jaqyn adamdar bolýy kerek ekenin de eske saldy.
"Siz olardy óz qolyńyzben óltirdińiz. Denelerin tiisti túrde jerlemei, shuńqyrǵa tastadyńyz. Naýryzdyń denesi úidiń mańynda jatqanyn bile tura, sol jerde esh alańsyz ómir súre berdińiz. Keiin Meiramgúldi óltirip, shuńqyrdy qaita qazyp, onyń denesin Naýryzdyń ústine kómdińiz. Mundai áreketterdi adamgershilik nemese moraldyq turǵydan esh aqtaýǵa bolmaidy", – dedi sýdia.
Ol sot talqylaýy kezinde qaza bolǵandardyń denelerin eksgýmatsiialaý barysy túsirilgen videolar zerttelgenin aitty. Beinejazbalar máiitterdiń qanshalyqty qatty shirigenin anyq kórsetken.
"Al Naýryz ben Meiramgúl qandai ómir súrip úlgerdi?"
Sýdia sot protsesinde jábirlenýshilerdi jaǵymsyz jaǵynan kórsetýge jáne bolǵan jaǵdaiǵa olardy kináli etip shyǵarýǵa tyrysqan Sársemálievtiń anasy men ápkesiniń jaýaptaryna da jeke toqtaldy.
Onyń aitýynsha, marqumdar endi ózderin qorǵai almaidy. Al sotqa usynylǵan dálelderdiń eshqaisysy olardyń atyna aitylǵan aiyptaýlardy rastamaǵan.
Aiyptalýshynyń anasynyń "balam ómirde qyzyq kórmedi" degen sózine sýdia: "Al Naýryz ben Meiramgúl qandai ómir súrip úlgerdi?" – dep jaýap qaitardy.
Sýdia eki jábirlenýshiniń de bala kezinen múgedektikpen ómir súrgenin, taǵdyrlarynyń qaiǵyly aiaqtalǵanyn atap ótti. Olar endi eshqashan armandaryn júzege asyra almaidy, otbasyn quryp, urpaq súie almaidy.
Sot aiyptalýshynyń ómir boiy bes balasyn tárbielep, naýqas áieline kútim jasaǵany týraly ýájdi de qabyldamady.
Sýdianyń aitýynsha, óz balalary men jubaiyna qamqorlyq jasaý – erlik nemese jazany jeńildetetin jaǵdai emes, árbir ata-ananyń tabiǵi mindeti.
Úkimdi túsindirýdi qorytyndylaǵan Zarema Hamidýllina Sársemálievtiń áreketteri bir adamnyń ǵana emes, tutas bir otbasynyń taǵdyryn talqandap, marqumdardyń týystaryna ǵana emes, búkil qoǵamǵa aýyr qasiret ákelgenin aitty.
"Otbasylyq jaǵdai qanshalyqty kúrdeli bolsa da, otbasyn saqtap qalýǵa sabyr, jaýapkershilik, ózara qurmet pen keshire bilý kómektesedi. Ashý men óshpendilik eshqashan máseleni sheshpeidi. Olar orny tolmas qaiǵyǵa ǵana alyp keledi", – dep qorytyndylady sýdia.
