Qarjy monitoring agenttigi tóraǵasynyń orynbasary Jeńis Elemesov gidrotehnikalyq nysandardy kútip ustaýǵa bólingen biýdjet qarjysyn jymqyrdy degen kúdikke ilingender qamaýǵa alynbaǵanyn málimdedi, - dep habarlady Dalanews.kz.
Buǵan deiin QMA Memleket basshysynyń tapsyrmasy boiynsha Úkimet, kvazimemlekettik kompaniialar, kásipkerler jáne memlekettik qorlar 140 milliard teńgeden asa qarajat bólgenin jariialady.
"Almaty qalasy, Aqtóbe, Qyzylorda oblystary men Ulytaý oblysyndaǵy qarjy monitoringi organdary urlyq deregi boiynsha tórt is qozǵady. Kúdikti retinde bes adam anyqtaldy. Keltirilgen zalaldyń jalpy somasy 1 milliard teńgeden asty”, - dep habarlaǵan edi Qarjy monitoringi agenttigi (QMA) buǵan deiin.
Sonymen qatar, agenttik tóraǵasy Dmitrii Malahov bólingen qarjy qaida ketkenin tekserý qajet ekenin de basa aitty.
“Vedomstvonyń aýmaqtyq departamentteriniń basshylary memlekettik organdar men sharýashylyq júrgizýshi sýbektilerdiń qyzmetine aralaspai, bógetterdi, sý burý qurylystaryn salýǵa, sondai-aq ózen arnalaryn tereńdetýge bólingen qarjynyń utymdy jumsalýyn zerdeleýi qajet”, - dep tapsyrdy Malahov.
Al búgin Jeńis Elemesov kúdiktiler qamaýǵa alynbaǵanyn jetkizdi. Degenmen bul qarajat buǵan deiin bólingen bolyp shyqty.
"Bul qarjy gidrologiialyq nysandardy kútip ustaýǵa buryn bólingen. Onyń qazir bólingen 140 milliard teńgege qatysy joq. Búginde tender alǵan kásipkerler men aktige qol qoiýǵa qatysqan laýazymdy tulǵalar kúdiktiler qatarynda. Ázirshe eshkim tutqyndalǵan joq", - dedi tóraǵanyń orynbasary Májilis kýlýarynda.
Sonymen qatar, búginde qylmystyq is tergelip jatqanyn, eshkimge naqty aiyp taǵylmaǵanyn málimdedi.
"Bultartpaý sharasyn áli tańdaǵan joqpyz. Bultartpaý sharasyn tańdaý úshin qylmystyń sanatyn kórsetý kerek. Tergeý barysynda biz barlyq derekti anyqtaimyz", - dedi Jeńis Elemesov.
