سۋ تاسقىنىنا قارسى جۇمىستا جىمقىرىلعان قارجى: اگەنتتىك ءمان-جايدى ايتتى

ساعىنىش سارداروۆا 24 ءساۋ. 2024 14:10 2346

قارجى مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ گيدروتەحنيكالىق نىسانداردى كۇتىپ ۇستاۋعا بولىنگەن بيۋدجەت قارجىسىن جىمقىردى دەگەن كۇدىككە ىلىنگەندەر قاماۋعا الىنباعانىن مالىمدەدى، - دەپ حابارلادى Dalanews.kz.

بۇعان دەيىن قما مەملەكەت باسشىسىنىڭ تاپسىرماسى بويىنشا ۇكىمەت، كۆازيمەملەكەتتىك كومپانيالار، كاسىپكەرلەر جانە مەملەكەتتىك قورلار 140 ميلليارد تەڭگەدەن اسا قاراجات بولگەنىن جاريالادى.

"الماتى قالاسى، اقتوبە، قىزىلوردا وبلىستارى مەن ۇلىتاۋ وبلىسىنداعى قارجى مونيتورينگى ورگاندارى ۇرلىق دەرەگى بويىنشا ءتورت ءىس قوزعادى. كۇدىكتى رەتىندە بەس ادام انىقتالدى. كەلتىرىلگەن زالالدىڭ جالپى سوماسى 1 ميلليارد تەڭگەدەن استى”، - دەپ حابارلاعان ەدى قارجى مونيتورينگى اگەنتتىگى (قما) بۇعان دەيىن.

سونىمەن قاتار، اگەنتتىك ءتوراعاسى دميتريي مالاحوۆ بولىنگەن قارجى قايدا كەتكەنىن تەكسەرۋ قاجەت ەكەنىن دە باسا ايتتى.

“ۆەدومستۆونىڭ اۋماقتىق دەپارتامەنتتەرىنىڭ باسشىلارى مەملەكەتتىك ورگاندار مەن شارۋاشىلىق جۇرگىزۋشى سۋبەكتىلەردىڭ قىزمەتىنە ارالاسپاي، بوگەتتەردى، سۋ بۇرۋ قۇرىلىستارىن سالۋعا، سونداي-اق وزەن ارنالارىن تەرەڭدەتۋگە بولىنگەن قارجىنىڭ ۇتىمدى جۇمسالۋىن زەردەلەۋى قاجەت”، - دەپ تاپسىردى مالاحوۆ.

ال بۇگىن جەڭىس ەلەمەسوۆ كۇدىكتىلەر قاماۋعا الىنباعانىن جەتكىزدى. دەگەنمەن بۇل قاراجات بۇعان دەيىن بولىنگەن بولىپ شىقتى.

"بۇل قارجى گيدرولوگيالىق نىسانداردى كۇتىپ ۇستاۋعا بۇرىن بولىنگەن. ونىڭ ءقازىر بولىنگەن 140 ميلليارد تەڭگەگە قاتىسى جوق. بۇگىندە تەندەر العان كاسىپكەرلەر مەن اكتىگە قول قويۋعا قاتىسقان لاۋازىمدى تۇلعالار كۇدىكتىلەر قاتارىندا. ازىرشە ەشكىم تۇتقىندالعان جوق"، - دەدى ءتوراعانىڭ ورىنباسارى ءماجىلىس كۋلۋارىندا.

سونىمەن قاتار، بۇگىندە قىلمىستىق ءىس تەرگەلىپ جاتقانىن، ەشكىمگە ناقتى ايىپ تاعىلماعانىن مالىمدەدى.

"بۇلتارتپاۋ شاراسىن ءالى تاڭداعان جوقپىز. بۇلتارتپاۋ شاراسىن تاڭداۋ ءۇشىن قىلمىستىڭ ساناتىن كورسەتۋ كەرەك. تەرگەۋ بارىسىندا ءبىز بارلىق دەرەكتى انىقتايمىز"، - دەدى جەڭىس ەلەمەسوۆ.


ۇسىنىلعان
سوڭعى جاڭالىقتار