Búgin SQO ákimi Ǵaýez Nurmuhambetov Petropavl men Qyzyljar aýdanynda bógetterdi nyǵaitý jumystaryn jáne arnalardyń qurylysyn tekserdi,- dep habarlaidy Dalanews.kz
Qyzyljar aýdanynda Sokolovka, Bolshaia Malyshka jáne Vagýlino aýyldary sý basý qaýpi bar aimaqtarda ornalasqan. Qaýipti azaitý maqsatynda Sokolovka mańyndaǵy Esil ózeninde jańa ainalma kanal jasalýda. Bul jumystar osy aýyldarǵa jaqyn ózenniń sý ótkizý qabiletin ulǵaitady.
Tasqynnyń sharyqtaý sheginde Petropavl sý toraby arnanyń tarylýy saldarynan sýdy qajetti kólemde ótkize almaidy. Bul máseleniń sheshimi - Zarechnyi kentiniń janynda ainalma kanal qurý. Qazir uzyndyǵy 3,7 km bolatyn arnanyń qurylysy belsendi júrgizilýde, ol alǵashqy kezeńde sýdy ótkizýdi qamtamasyz etedi.
Sonymen qatar, Ýshev pen Bylǵary kenti bógetterine temirbeton plitalaryn tóseý jalǵasýda. Bul jumys bógetterdiń beriktigin arttyryp, olardyń shaiylýyn boldyrmaidy jáne shaǵyn aýdandardy sý basýdan qorǵaýdy qamtamasyz etedi.
