WhatsApp arqyly jalǵan aqparat taratqan Mańǵystaý oblysynyń turǵynyna 73 myń teńge aiyppul salyndy, dep habarlaidy Dalanews.kz.
Sotta anyqtalǵandai, quqyq buzýshyǵa qatysty ákimshilik quqyq buzýshylyq týraly kodekstiń 456-2-babynyń 3-bóligi (kórneý jalǵan aqparat jariialaý, taratý) boiynsha ákimshilik is qozǵaldy.
"A.-nyń uialy telefonynan WhatsApp qyzmeti arqyly Atyraý oblysynda tótenshe jaǵdai oryn alǵany týraly jalǵan, dáieksiz aqparat taratqany anyqtaldy.
Ákimshilik quqyq buzýshylyq ister jónindegi mamandandyrylǵan sotynyń qaýlysymen ákimshilik quqyq buzýshylyq týraly kodekstiń 456-2-babynyń 3-bóligimen kináli dep tanylǵan Aqtaý qalasynyń turǵynyna 20 AEK (73 840 teńge) kóleminde aiyppul salyndy", – delingen sot habarlamasynda.
Qaýly kúshine endi.
Eske salaiyq, buǵan deiin Respýblikalyq shtab basshysynyń sý tasqynyna qarsy is-sharalardy úilestirý jáne sý tasqyny saldaryn joiý jónindegi orynbasary Qanat Bozymbaev sý tasqyny kezinde dúrbeleń týdyratyn jalǵan aqparat taratqandar qylmystyq jaýapkershilikke tartylatynyn eske salǵan edi.
Onyń aitýynsha, mundai jalǵan aqparattar qoǵamda, ásirese zardap shekken óńirlerde jii dúrbeleń týdyrady.
"Osyndai jalǵan habarlamalardyń nemese Tótenshe jaǵdaimen kúres jónindegi shtabtardyń jalǵan akkaýnttarynyń barlyq avtorlaryna bul aqparatty jariialaýdaǵy jaýapkershilik týraly eskertkim keledi. "Onlain platformalar jáne onlain jarnama týraly" zań bar, oǵan sáikes paidalanýshylar ornalastyrylǵan jáne taratylatyn mazmunnyń durystyǵyn tekserýge, jalǵan aqparatty taratpaýǵa, sondai-aq mundai aqparatty jáne kez kelgen zańsyz mazmundy joiýǵa mindetti.
Tiisti qurylymdar mundai jalǵan aqparatqa taldaý júrgizedi, qajetsiz dúrbeleń týdyryp, otandastaryn aldaǵan kez kelgen azamat, óz áreketteri úshin naqty aqy tóleitin bolady", - dedi Qanat Bozymbaev.
