Beiresmi derekterge súiensek, eks-prezidenttiń úsh áieli bar. Nazarbaevtyń resmi áieli Sara Nazarbaeva men onyń úshinshi, «beiresmi áieli» Ásel Qurmanbaeva týraly aqparat jetkilikti bolǵanmen, Raqysheva týraly tek sybys estiledi.
Jýrnalister «Búrkit» memlekettik áýe kompaniiasynyń burynǵy stiýardessasy milliardtaǵan ainalymy bar biznes bastaǵanyn anyqtady. Burynǵy kúieý bala Rahat Áliev "Ókil ata" kitabynda Gúlnar Raqysheva men memleket basshysynyń qarym-qatynasy «1996 jyly erekshe jaqyn bolǵan» dep jazǵan. 26 jasynda oǵan tipti stiýardessa bolyp jumys isteýdiń qajeti bolmady, sebebi Raqysheva «Eir Astana» kompaniiasynyń vitse-prezidenti boldy.
Ómirderekti paraqtasaq, Raqysheva 1970 jyly 2 naýryzda ákesi Oraz Raqyshev boryshyn ótegen Máskeý túbindegi Týla qalasynda dúniege kelgen. 1981-1986 jyldary Vengriianyń Mor qalasyndaǵy Ońtústik Qarýly Kúshter tobynyń №70 mektebinde oqyǵan.
Raqyshevanyń ǵana emes, ákesiniń de joly boldy delingen derekte. Óitkeni «Semei» áskeri garnizonynda qyzmet etip, sharýashylyqqa jaýapty bolyp júrgeninde onyń juldyzy jandy. Eks-podpolkovnik Qorǵanys ministriniń orynbasary qyzmetinen bir-aq shyqty.
Basylymnyń málimetinshe, Gúlnar Orazqyzy Almaty qalasyndaǵy Tóle bi kóshesi №40 úi mekenjaiynda tirkelgen «Firma Sharm» seriktestiginiń iesi. 1998 jyly negizi qalanǵan kompaniia jyljymaityn múlikti jalǵa berý jáne shashtaraz qyzmetimen ainalysady. Statsnet derekter bazasyna sáikes, firmanyń jyldyq ainalymy – 100 million teńge.
Isker áiel Almaty men Astanadaǵy Sergio Group sheteldik brendterdiń jihazy men ydys-aiaǵyn satatyn dúkennen de qomaqty tabys tabady. Kompaniianyń jyldyq tabysy tórt-alty milliard teńgeni quraidy.
Kompaniianyń negizin Prezident janyndaǵy strategiialyq zertteýler institýtynda jumys istegen Sergei Ryjakov qalaǵan. 2010 jyly onyń ekinshi quryltaishysy Gúlnar Raqysheva boldy.
Eks-prezidenttiń «ekinshi áieli» «Moi servis» kompaniiasyna da ielik etedi. Biraq, sońǵy jyldary zańdy tulǵadan salyq tólenbegeni anyqtalyp otyr. Budan bólek, ol «Barys» qaiyrymdylyq qorynyń da iesi. Qor týraly málimet az-kem. Bastapqyda qordyń quryltaishysy Rýslan Radmiruly Raqyshev boldy. Basylym ol Gúlnardyń aǵasy Radmir Raqyshevtyń uly bolýy múmkin ekenin jazady.
2010 jyly Gúlnar Raqysheva «Buqtyrma tsement kompaniiasy» aktsionerlik qoǵamynyń direktorlar keńesiniń múshesi boldy.
Gúlnár Raqyshevanyń aǵasy, qorǵanys salasynyń mamany bolyp jumys isteitin Radmir Raqyshev ápkesi men eks-prezidenttiń qarym-qatynasy týraly áńgimeni Áliev pen Hrapýnov oilap tapqan «ótirik» dep atady.
Nazarbaev ókilettiligin 2019 jyly Toqaevqa berdi. Onyń resmi ómirbaianynda úsh qyz tárbielep ósirgen Sara Nazarbaevaǵa úilengeni aitylady. Elbasy suhbattarynda odan basqa áiel men balalardyń atyn atamaǵan.
https://dalanews.kz/sadak/95307-qazaqstan-reseyding-yqpalynan-eshqasha
