Kaspii teńizindegi áskeri oqý-jattyǵý kezinde aman qalǵan úsh áskeri qyzmetshiniń qazirgi jaǵdaiy týraly jańa málimet jariialandy. Úsheýi de Mańǵystaý oblystyq kópbeiindi aýrýhanasynda em qabyldap jatyr, dep habarlaidy dalanews.kz.
Meditsinalyq mekemeniń baspasóz qyzmetiniń málimetinshe, oqiǵa bolǵan kúni, 24 qyrkúiekte aýrýhanaǵa Aqjol Temerhan jetkizilgen.
Al Nikita Ýdalov pen Beket Qýandyq 26 qyrkúiekte meditsinalyq mekemege túsken.
Qazir úsh áskeri qyzmetshi de aýrýhananyń terapiia bólimshesinde jatyr. Dárigerler olardyń jaǵdaiyn turaqty dep baǵalap otyr.
Mamandardyń aitýynsha, sarbazdardyń esi anyq, ózdiginen júrip-tura alady. Qazirgi ýaqytta olardyń densaýlyǵyna qatysty shaǵymy joq. Úsheýi de dárigerlerdiń turaqty baqylaýynda.
Eske salaiyq, 24 qyrkúiekte áskeri oqý-jaýyngerlik tapsyrmany oryndaý kezinde aýa raiy kúrt nasharlap, qatty jel soqqan. Sonyń saldarynan Kaspii teńizinde 17 áskeri qyzmetshi sýǵa ketken. Olardyń úsheýi aman qalyp, 14 áskeri qyzmetshi qaza tapqan.
