I. Jansúgirov atyndaǵy Jetisý ýniversitetinde 1-kýrs stýdentterine arnalǵan «Bolashaqqa birge qadam» atty qabyldaý jiyny ótti. Jańa oqý jylynyń bastalýyna arnalǵan shara stýdenttik ómirge alǵash qadam basqan jastarǵa erekshe kóńil kúi syilady. Biylǵy oqý jylynda Jetisý ýniversitetine bakalavriat, magistratýra, doktorantýra baǵdarlamalary boiynsha 2019 bilim alýshy qabyldandy. Jiynǵa ýniversitet basshylyǵy, oqytýshy-professorlar quramy, ata-analar men stýdentter qatysty, dep habarlaidy dalanews.kz.
Shara barysynda bilim ordasynyń tabaldyryǵyn alǵash attaǵan jas bilimgerlerge ardager ustazdar bata berip, stýdenttik ómirdiń jańa múmkindikteri men jaýapkershiligi týraly aitty. Jiynda sóz alǵan I. Jansúgirov atyndaǵy Jetisý ýniversitetiniń rektory, professor Ermek Bóribaev jastardy jańa oqý jylynyń bastalýymen quttyqtap, bilim men ǵylym jolyndaǵy alǵashqy qadamdaryna sáttilik tiledi.
«Búgin sizder úshin erekshe kún. Ýniversitet tabaldyryǵyn alǵash attap, úlken bilim ordasynyń stýdenti atandyńyzdar. Aldaryńyzda bilim alýǵa, óz qabiletterińizdi damytýǵa, jańa dostar taýyp, bolashaq maman retinde qalyptasýǵa mol múmkindik tur. Jetisý ýniversiteti sizderdiń sapaly bilim alyp qana qoimai, tulǵa retinde qalyptasýlaryńyzǵa barlyq jaǵdai jasaýǵa umtylady. Ár jas ózin damytýǵa, ǵylymi jáne shyǵarmashylyq jobalarǵa qatysýǵa, qoǵamdyq ómirge belsendi aralasýǵa zor múmkindik alady. Biz sizderden izdenis, jaýapkershilik jáne belsendilik kútemiz. Ýniversitettiń jetistigin eseleitin, el bolashaǵyna qyzmet etetin bilikti maman bolyńyzdar. Stýdenttik jyldaryńyz jarqyn jetistikterge toly bolsyn!» – dedi rektor.
Shara barysynda 1-kýrs stýdentterine ýniversitettiń ishki tártibi, bilim berý múmkindikteri, stýdenttik uiymdar men jastar bastamalary jóninde aqparat berildi.
«Bolashaqqa birge qadam» atty qabyldaý jiyny shaǵyn kontserttik baǵdarlamaǵa ulasyp, jas bilim alýshylarǵa kóterińki kóńil kúi syilady.
