Túrkistan oblysy Sozaq aýdanynda zeinetker mektepter men bilim bólimindegi jemqorlyq derekterin jaiyp saldy, - dep habarlaidy Dalanews.kz Qaz365.kz-ke siltep.
Óńir ákimi Nuralhan Kósherovtiń Sozaq aýdany turǵyndarymen kezdesýi barysynda Aqsaqaldar keńesiniń tóraǵasy osyndai málimdeme jasap, ákimnen máseleni sheship berýdi suraǵan.
“Nemerelerimiz joǵary oqý ornyn bitirip kelgen soń mektepke jumysqa ornalasaiyn dese, oblys ortalyǵyna baryp biliktiligin tekseretin test tapsyrýdy mindetteidi. Oblys ortalyǵy Túrkistanǵa baryp test tapsyryp, ótip tursa da, "aty-jóniń kompiýterde shyqpai tur, aýdanǵa baryp engizip kelińiz" dep qaitaryp jiberedi. Aýdanǵa kelse mektep direktoryna jiberedi. Al mektep direktory atyńdy bazaǵa engizý úshin 1,5 mln teńge suraidy. Berseń tirkeidi, bermeseń joq. Al eger beretin bolsań, oblystaǵy testten ótseń de, ótpeseń de ótkizip jiberedi", - degen ol kezdesýde.
Qariia bilim sapasy jaiyn da qozǵaǵan.
"Mektep bitiretin balalarymyzdyń 25-ten tek beseýi grantqa oqýǵa túsedi. Qalǵan 20-sy aqyly oqidy. Buryn bizdiń kezimizde aýyl balalarynyń bári tegin oqityn edi. Bilim sapasy jaqsy edi. Qazir bilim berý deńgeii túsip ketti. Oǵan sebep: mektepterge aýdannan kelgen komissiiaǵa dep 5 myń, oblystan kelgen komissiiaǵa 10 myńnan muǵalimderden aqsha jinap alady. Kelgen komissiia mektep ashanasyna jaiylǵan dastarhanǵa keledi de, jinalǵan aqshany alyp qaityp ketedi. Bilim sapasyn, mektep-synyptardyń jaiyn, oqýshylardy teksermeidi. Osy máseleni sheship berýińizdi suraimyn, ákim myrza”, – dedi jiynda sóz sóilegen aýyl aqsaqaly.
Basylym málimetinshe, oblys ákimi aqsaqaldyń sózin tyńdap, máselelerdi sheshýge aýdan turǵyndarynyń kómektesýin suraǵan.
“Aqsaqal, nemerelerińizben bolǵan oqiǵada quqyq qorǵaý organdaryna aryzdansyn. Naqty faktiler keltirse, eshkim mundai qylmystan jaltaryp kete almaidy. Qashanǵy mundai jaǵdailarǵa kóz jumyp júre bermekpiz?! Sondyqtan osyndai jaǵdailar kezdesse, birden quqyq qorǵaý organdaryna, ákimdikterge aryz-shaǵymmen baryńyzdar. Sizder bolyp, biz bolyp mundai jaǵdailardyń aldyn alýymyz kerek. Ol úshin ózderińizdiń ashyqtyqtaryńyz ben qajyrly kómekterińiz qajet”, – dedi oblys ákimi Nuralhan Kósherov.
