Ǵaýez Nurmuhambetov bastaǵan Soltústik Qazaqstan oblysynyń resmi jáne iskerlik delegatsiiasy Resei Federatsiiasynyń Qorǵan oblysyna jumys saparymen bardy, – dep habarlaidy Dalanews.kz
Bul jaily SQO ákimi áleýmettik jelidegi paraqshasynda jazdy.
"Elimiz ben kórshiles memlekettiń arasyndaǵy ózara tiimdi yntymaqtastyq nyǵaia túsýde. Sońǵy bes jylda SQO men RF arasyndaǵy taýar ainalymy 1,6 esege ósip, 700 million AQSh dollaryna jetti. Alaida, bul áleýettiń shegi emes. Qorǵan oblysynyń gýbernatory Vadim Shýmkovpen ótken kezdesýde ekijaqty áriptestikti odan ári keńeitý perspektivalary talqylandy. Osy maqsatta saýda-ekonomikalyq, ǵylymi-tehnikalyq jáne gýmanitarlyq salalardaǵy yntymaqtastyq týraly kelisimdi iske asyrý jónindegi jol kartasyna qol qoiyldy", - dep jazdy Ǵaýez Nurmuhambetov.
Biznes-bastamalar men birlesken investitsiialyq jobalardy júzege asyrý máselelerine erekshe kóńil bólindi. Bul taqyryptar shekaralas eki oblystyń isker toptarymen ótken dialogtyń ózegine ainaldy. SQO men Qorǵan oblysynyń kásipkerleri B2B formatynda máselelerge naqtyraq toqtaldy.
Birneshe mańyzdy qujattarǵa qol qoiyldy: Qorǵan oblysynyń Saýda-ónerkásip palatasy men SQO-nyń kásipkerler palatasy arasyndaǵy kelisim, «Soltústik» ÁKK janyndaǵy investorlardy qoldaý jáne innovatsiialardy damytý ortalyǵy men «Agrokompleks Kýrgansemena» JShQ arasyndaǵy memorandým, sondai-aq «Kýrgandormash» AQ men «Qyzyljar» AEA arasyndaǵy yntymaqtastyq týraly memorandým. Kommýnaldyq jáne arnaiy tehnika shyǵaratyn «Kýrgandormash» «Qyzyljar» aimaǵynda kásiporyn ashýdy josparlap otyr.
Óndiristik áleýetti tereńirek zerdeleý maqsatynda SQO delegatsiiasy «Kýrgandormash», "Kýrganstalmost", «Vezdehody Býrlak» kásiporyndary men indýstriialyq parkke bardy. Bul nysandar ónerkásiptik kooperatsiia men tehnologiia almasý turǵysynan praktikalyq qyzyǵýshylyq týdyrdy.
Sonymen qatar Qorǵanda turatyn qazaqtarmen jyly kezdesý ótti. Júzdesý barysynda qoldaý, bilim berý jáne mádeni bailanystardy keńeitý máseleleri qozǵaldy.
Sapar sońynda oblys ákimi Qorǵandyq áriptesterge mazmundy baǵdarlama úshin alǵysyn bildirdi. Bul sapar men qol qoiylǵan memorandýmdar men kelisimder óńiraralyq yntymaqtastyqty nyǵaitý jolyndaǵy mańyzdy qadam bolyp, seriktestikke jańa serpin bermek.
