Oblys ortalyǵynda «Jańa Konstitýtsiia - Ádiletti Qazaqstannyń berik negizi» atty dóńgelek ústel ótti. Oǵan aimaq basshysy Nurymbet Saqtaǵanov qatysty, dep habarlaidy dalanews.kz.
«Búgin biz el tarihyndaǵy asa mańyzdy oqiǵa - jańa Halyq Konstitýtsiiasy resmi kúshine enetin jaýapty kezeńde onyń qoǵam ómirindegi orny men mańyzyn talqylap, pikir almasý úshin sarapshylar alańynda arnaiy bas qosyp otyrmyz. Ata Zań - memleketimizdiń uzaq merzimdi damý baǵytyn aiqyndaityn, táýelsizdigimizdiń tuǵyryn bekemdep, azamattardyń quqyqtary men bostandyqtaryna kepildik beretin basty quqyqtyq qujat. Qoǵam suranysy men zaman talaptaryna sai júrgizilgen konstitýtsiialyq reformalar elimizdiń quqyqtyq júiesin jetildirýge, memlekettik basqarýdy jańǵyrtýǵa, azamattardyń memlekettik basqarý isine qatysý múmkindikterin keńeitýge jáne demokratiialyq institýttardy nyǵaitýǵa baǵyttaldy», - dedi oblys ákimi.
Onyń aitýynsha, Konstitýtsiianyń qaǵidattaryn ómirde tiimdi iske asyrý - tek memlekettik organdardyń ǵana emes, azamattyq qoǵam institýttarynyń, úkimettik emes uiymdardyń, sarapshylar qaýymdastyǵy men árbir azamattyń ortaq mindeti.
Jiyn barysynda Jańa Konstitýtsiianyń qoǵamdaǵy orny, onyń qaǵidattaryn is júzinde júzege asyrý joldary jáne azamattyq qoǵam institýttarynyń osy úderiske qosar úlesi jan-jaqty talqylandy. QAEÝ ǵylymi jumystar jáne joǵary oqý ornynan keiingi bilim berý jónindegi prorektory, qaýymdastyrylǵan professor Iýliia Gavrilova «Ulttyq quqyqtyq júieni damytýdyń negizgi jańashyldyqtary men keleshegi» taqyrybynda sóz sóilese, S.Amanjolov atyndaǵy ShQÝ professory, zań ǵylymdarynyń kandidaty Gúlmira Bairkenova konstitýtsiialyq qaǵidattardyń biri - zań aldyndaǵy barlyq azamattardyń teńdigi, quqyqtar men bostandyqtardy qorǵaýdyń naqty tetikteri týraly baiandama jasady. Basqa da spikerler óz oilaryn ortaǵa salyp, mazmundy pikir almasty.
