Soltústik Qazaqstan oblysynyń Blagoveshenka aýylynda qaiǵyly oqiǵa boldy. Aldyn ala málimet boiynsha, 66 jastaǵy er adam óz anasyn óltirdi degen kúdikpen ustaldy, dep habarlaidy dalanews.kz.
Kórshilerdiń aitýynsha, 89 jastaǵy áiel ulyn kartop qazýǵa kómektesýge shaqyrǵan. Alaida arada biraz ýaqyt ótken soń qart ananyń denesi ulynyń úiiniń aýlasynan tabylǵan.
Aldyn ala aqparatqa sáikes, áieldiń denesinen zorlyq-zombylyq belgileri anyqtalǵan. Keibir málimetterde qylmys kezinde balta qoldanylǵany aitylyp otyr.
Politsiia kúdikti retinde 66 jastaǵy er adamdy ustady. Qazir ol ýaqytsha ustaý izoliatoryna qamalǵan.
Soltústik Qazaqstan oblysy politsiia departamentiniń málimetinshe, atalǵan derek boiynsha adam óltirý faktisimen sotqa deiingi tergeý bastaldy.
– Politseiler Blagoveshenka aýylynyń 89 jastaǵy turǵynynyń ólimine bailanysty qylmystyq isti tergep jatyr. Qajetti saraptamalar taǵaiyndaldy. Oqiǵanyń barlyq mán-jaiy men sebepteri anyqtalýda, – dep habarlady politsiia.
Resmi túrde rastalmaǵan aqparatqa sáikes, ustalǵan azamattyń buryn psihikalyq densaýlyǵyna qatysty máseleleri bolǵan bolýy múmkin. Alaida bul málimet ázirge quqyq qorǵaý organdary tarapynan rastalǵan joq.
