Soltústik Qazaqstan oblysynda turǵyndardyń dene shynyqtyrý jáne sportpen ainalysý múmkindikterin keńeitýge baǵyttalǵan sport infraqurylymyn damytý jumystary qarqyndy jalǵasýda. 2024 jyly óńirde 36 sport nysany paidalanýǵa berildi,- dep habarlaidy Dalanews.kz
Olardyń qatarynda tórt sport kesheni bar: Petropavl qalasynda ústel tennisi ortalyǵy men «Bereke» dene shynyqtyrý-saýyqtyrý kesheni, sondai-aq Jambyl aýdanynyń Presnovka aýylyndaǵy jáne Taiynsha aýdanynyń Kellerovka aýylyndaǵy keshender. Úsh jabyq hokkei korty salyndy – Shal aqyn aýdanynyń Sergeevka qalasynda, Jambyl aýdanynyń Presnovka aýylynda jáne Aiyrtaý aýdanynyń Saýmalkól aýylynda. Budan bólek, Aiyrtaý, Aqjar, Jambyl, Qyzyljar, Ǵabit Músirepov, Timiriazev, Ýálihanov aýdandarynda jáne Petropavl qalasynda 23 mini-fýtbol alańy ashyldy. Sondai-aq Aqjar, M. Jumabaev, Ǵ. Músirepov aýdandarynda jáne oblys ortalyǵynda alty sport alańy paidalanýǵa berildi.
2025 jyldyń qańtar aiynda Esil aýdanynyń Petrovka aýylynda jabyq hokkei korty ashyldy. Jeke investitsiialar esebinen Aqqaiyń aýdanynyń Daiyndyq aýylynda (investor – «Daiyndyq» JShS, B. A. Shaimerdenov) jáne Taiynsha aýdanynyń Taiynsha qalasynda («KazFoodProducts» kompaniiasy) sport keshenderi salyndy.
Oblysta Mamliýtka qalasynda dene shynyqtyrý-saýyqtyrý kesheniniń, Qyzyljar aýdanynyń Beskól aýylynda jabyq hokkei qorynyń, Petropavl qalasynda júzý basseini men oiyn zaly bar muz arenasynyń, Ýálihanov aýdanynyń Kishkenekól aýylynda júzý basseininiń qurylysy jalǵasýda. Biyl Aqqaiyń aýdanynyń Smirnovo aýylynda jabyq hokkei qorynyń qurylysy bastaldy.
Soltústik Qazaqstan oblysynda sport infraqurylymyn damytý halyqtyń sportqa tartylý deńgeiin arttyryp qana qoimai, bolashaq chempiondardy daiarlaýǵa, túrli deńgeidegi jarystardy ótkizýge jáne qoǵamda salaýatty ómir saltyn nyǵaitýǵa múmkindik beredi.
