SQO Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, oblys ákimdiginiń 2023 jylǵy 4 jeltoqsandaǵy № 233 qaýlysy negizinde 31 mamyr — Saıası qýǵyn-súrgin jáne asharshylyq qurbandaryn eske alý kúnine oraı jyl saıynǵy negizde birjolǵy áleýmettik kómek tóleý kózdelgen, – dep habarlaıdy Dalanews.kz

"Kómektiń bul túri saıası qýǵyn-súrginge tikeleı ushyraǵan adamdarǵa 15 AEK mólsherinde beriledi. Al eger ata-anasymen birge jazalaý oryndarynda, jer aýdarýda nemese arnaıy qonystaný oryndarynda bolsa, repressıa saldarynan ata-anasynan nemese olardyń bireýinen aıyrylǵan bolsa jáne ata-anasy qýǵyn-súrginge ushyraǵan kezde kámelet jasyna jetpegen bolsa, oǵan 10 AEK mólsherinde tólenedi", - delingen baspasóz habarlamasynda.

Áleýmettik kómek tizim boıynsha avtomatty túrde tólenedi. Iaǵnı, kómek alýshylarǵa ótinish jazý nemese qujat jınaý qajet emes. Bul tizimderdi ýákiletti uıymdar nemese tıisti mekemeler usynǵan.

Bıyl jalpy somasy 84 mln teńgege kómek kórsetilmek.