Soltústik Qazaqstan oblysynda politsiiadaǵy jemqorlyq isi boiynsha úkim shyqty. Petropavl qalalyq soty burynǵy maior Erbolat Qaptaevty birneshe ret para alǵany úshin kináli dep tapty, dep habarlaidy Dalanews.kz.
Ratel.kz málimetinshe, sot Qaptaevtyń retsidivist Rýslan Nagýmanovpen bailanysta bolǵanyn, odan syilyqtar men qyzmetter alǵanyn anyqtady: telefon, avtokólik jaldaý, shottardy tóleý. Alaida aiyptalýshy munyń bárin tek jedel jumys aiasyndaǵy qatynas dep túsindirgen.
Sýdia qorǵaý tarapynyń bul ýájin joqqa shyǵardy.
"Nagýmanov telefondy saǵat 14:00-de satyp alǵan, al 14:27-de ony Qaptaevqa bergen. Bul jedel sharanyń bóligi bola almaidy", – delingen úkimde.
Aiyptaý tarapynan kýágerlerdiń aiǵaqtary, telefon áńgimeleriniń stenogrammalary, hat almasýlar jáne jasyryn tergeý áreketteriniń materialdary dálel retinde usynyldy. Prokýror burynǵy politseige 9 jyl bas bostandyǵynan aiyrý jazasyn suraǵan.
Qorǵaýshylar kerisinshe, dálelderdi jedel jumystyń ereksheligi turǵysynan baǵalaý kerek ekenin aityp, protsesti jabyq ótkizýdi suraǵan, biraq ótinish qanaǵattandyrylmady.
Bul rette Nagýmanovtyń keibir aiǵaqtary daýly boldy. Ol olardy qysymmen jáne jazany jeńildetýge ýáde bergen soń bergenin aitqan. Biraq sot dálelderdiń jiyntyǵyn jetkilikti dep sanady.
Nátijesinde Erbolat Qaptaevqa ortasha qaýipsizdik mekemesinde 8 jyl bas bostandyǵynan aiyrý jazasy taǵaiyndaldy. Sonymen birge sot ony politsiia maiory sheninen aiyrdy, múlkin tárkileýdi jáne memlekettik qyzmette ómir boiy qyzmet etýge tyiym salýdy bekitti.
Úkim zańdy kúshine engen joq. Qorǵaý tarapy apelliatsiiaǵa beretinin málimdedi.
Qaptaevtyń isimen qatar sotta Nagýmanovqa qatysty alaiaqtyq pen buzaqylyq derekteri boiynsha da is qaraldy. Sot alqasy oǵan shyǵarylǵan úkimdi ózgerissiz qaldyrdy. Ol aldaǵy 7 jylyn qatań rejimdegi koloniiada ótkizedi. Bul jait, keibir baqylaýshylardyń pikirinshe, onyń aiǵaqtaryn daýly etedi.
Qorǵaýshylar Qaptaevqa qarsy Nagýmanovtyń sózderi birqatar derekterge qaishy ekenin, qysym arqyly nemese jazany jeńildetý úshin berilgenin alǵa tartty. Advokattardyń pikirinshe, bul aiyptaý aktisiniń mazmunyna yqpal etýi múmkin edi.
