Soltústik Qazaqstan oblysynyń Sergeevka qalasynda «Eńbek» baǵdarlamasy aiasynda ońtústik óńirler men shetelden kóship kelgen azamattarǵa arnap salynǵan úilerdi buzý jumystary bastaldy. Memleket qarjysyna turǵyzylǵan baspanalardyń bir bóligi qaraýsyz qalyp, tonalǵan. Keibiri apatty dep tanylǵan. Endi jergilikti bilik biýdjet shyǵynyn qaitarý úshin burynǵy turǵyndarmen sottasýǵa májbúr, dep habarlaidy dalanews.kz.
Jergilikti aqparat quraldarynyń málimetinshe, shamamen alty jyl buryn Sergeevka qalasynyń shetinde qonys aýdarýshylarǵa arnap 109 úi salynǵan. Jobaǵa biýdjetten 800 million teńgege jýyq qarjy jumsalǵan.
Qazir olardyń 80-ge jýyǵyna turǵyndar qonystanǵan. Alaida ondaǵan úi bos tur. Al 14 baspana tolyq jaramsyz kúige túsip, apatty dep tanylǵan. Onyń tórteýi qazirdiń ózinde súrilip tastalǵan.
Jergilikti turǵyndardyń aitýynsha, jańa úilerdi tastap ketýge soltústiktiń uzaq ári qatal qysy sebep bolǵan. Óitkeni munda turý úshin turǵyndar otyn men mal azyǵyn aldyn ala daiyndaýy kerek.
Sergeevka turǵyny Beibit Halmatovtyń sózinshe, soltústikte qysqa daiyndyqqa birneshe ai ketedi.
«Birinshiden, munda qysqa daiyndalý kerek. Qystyń ózi alty aiǵa sozylady. Men eki ai boiy tek qysqa daiyndaldym. Mal ustaityn bolsań, astyq, bidai, saban jinaýyń kerek. Oǵan qosa kómir men otyn daiyndaisyń. Qalǵany birtindep retteledi», – deidi ol.
Al jubaiy Janar Sydyqovanyń aitýynsha, jańa jerde turmys quryp, tirshilik etýge bolady. Onyń sózinshe, úi jyly ári jaily, qajetti nysandar da jaqyn ornalasqan.
«Jaqsy, yńǵaily. Úi jyly. Balalar úide jeńil kiimmen júredi. Jalpy, soltústikte balalarymyz aýyrmaidy. Tabiǵaty tamasha. Aýrýhana, bazar, dúkender jaqyn. Bári qolaily. Peshti kúieýim jaǵady, bul istiń sheberi», – deidi Janar Sydyqova.
Degenmen keibir qonys aýdarýshylar úilerin aiaq astynan tastap ketken. Shal aqyn aýdany ákiminiń orynbasary Jarqyn Muhamedjanovtyń aitýynsha, keibir turǵyndar qys mezgilinde úidegi jihazdyń bir bóligin qaldyryp, eshkimge eskertpesten kóship ketken.
«Bir adam qysta ketip, jihazdyń bir bóligin qaldyrǵan. Keibir zattaryn alyp, ún-túnsiz kóship ketken. Turǵyndar bolmaǵan soń, úilerdi ashýǵa týra keldi. Olardy izdei bastasaq, telefondaryn óshirip tastaǵan. Sondyqtan sotqa talap aryz berdik», – dedi ol.
Qazir jergilikti bilik memlekettik baspanany tastap ketken 40 otbasyǵa qatysty sotqa talap aryz bergen. Sheneýnikter olardan memleket esebinen tólengen kóshý shyǵyndary men kótermeaqyny qaitarýdy talap etip otyr.
Alaida ákimdik ókilderi qarajatty óndirip alý árdaiym múmkin bola bermeitinin moiyndaidy. Sebebi keibir burynǵy turǵyndardy tabý qiyn, al birqatar jaǵdaida shyǵyndy óteitin adam da joq.
