سولتٷستٸك قازاقستان وبلىسىنىڭ سەرگەەۆكا قالاسىندا «ەڭبەك» باعدارلاماسى اياسىندا وڭتٷستٸك ٶڭٸرلەر مەن شەتەلدەن كٶشٸپ كەلگەن ازاماتتارعا ارناپ سالىنعان ٷيلەردٸ بۇزۋ جۇمىستارى باستالدى. مەملەكەت قارجىسىنا تۇرعىزىلعان باسپانالاردىڭ بٸر بٶلٸگٸ قاراۋسىز قالىپ, تونالعان. كەيبٸرٸ اپاتتى دەپ تانىلعان. ەندٸ جەرگٸلٸكتٸ بيلٸك بيۋدجەت شىعىنىن قايتارۋ ٷشٸن بۇرىنعى تۇرعىندارمەن سوتتاسۋعا مەجبٷر, دەپ حابارلايدى dalanews.kz.
جەرگٸلٸكتٸ اقپارات قۇرالدارىنىڭ مەلٸمەتٸنشە, شامامەن التى جىل بۇرىن سەرگەەۆكا قالاسىنىڭ شەتٸندە قونىس اۋدارۋشىلارعا ارناپ 109 ٷي سالىنعان. جوباعا بيۋدجەتتەن 800 ميلليون تەڭگەگە جۋىق قارجى جۇمسالعان.
قازٸر ولاردىڭ 80-گە جۋىعىنا تۇرعىندار قونىستانعان. الايدا ونداعان ٷي بوس تۇر. ال 14 باسپانا تولىق جارامسىز كٷيگە تٷسٸپ, اپاتتى دەپ تانىلعان. ونىڭ تٶرتەۋٸ قازٸردٸڭ ٶزٸندە سٷرٸلٸپ تاستالعان.
جەرگٸلٸكتٸ تۇرعىنداردىڭ ايتۋىنشا, جاڭا ٷيلەردٸ تاستاپ كەتۋگە سولتٷستٸكتٸڭ ۇزاق ەرٸ قاتال قىسى سەبەپ بولعان. ٶيتكەنٸ مۇندا تۇرۋ ٷشٸن تۇرعىندار وتىن مەن مال ازىعىن الدىن الا دايىنداۋى كەرەك.
سەرگەەۆكا تۇرعىنى بەيبٸت حالماتوۆتىڭ سٶزٸنشە, سولتٷستٸكتە قىسقا دايىندىققا بٸرنەشە اي كەتەدٸ.
«بٸرٸنشٸدەن, مۇندا قىسقا دايىندالۋ كەرەك. قىستىڭ ٶزٸ التى ايعا سوزىلادى. مەن ەكٸ اي بويى تەك قىسقا دايىندالدىم. مال ۇستايتىن بولساڭ, استىق, بيداي, سابان جيناۋىڭ كەرەك. وعان قوسا كٶمٸر مەن وتىن دايىندايسىڭ. قالعانى بٸرتٸندەپ رەتتەلەدٸ», – دەيدٸ ول.
ال جۇبايى جانار سىدىقوۆانىڭ ايتۋىنشا, جاڭا جەردە تۇرمىس قۇرىپ, تٸرشٸلٸك ەتۋگە بولادى. ونىڭ سٶزٸنشە, ٷي جىلى ەرٸ جايلى, قاجەتتٸ نىساندار دا جاقىن ورنالاسقان.
«جاقسى, ىڭعايلى. ٷي جىلى. بالالار ٷيدە جەڭٸل كيٸممەن جٷرەدٸ. جالپى, سولتٷستٸكتە بالالارىمىز اۋىرمايدى. تابيعاتى تاماشا. اۋرۋحانا, بازار, دٷكەندەر جاقىن. بەرٸ قولايلى. پەشتٸ كٷيەۋٸم جاعادى, بۇل ٸستٸڭ شەبەرٸ», – دەيدٸ جانار سىدىقوۆا.
دەگەنمەن كەيبٸر قونىس اۋدارۋشىلار ٷيلەرٸن اياق استىنان تاستاپ كەتكەن. شال اقىن اۋدانى ەكٸمٸنٸڭ ورىنباسارى جارقىن مۇحامەدجانوۆتىڭ ايتۋىنشا, كەيبٸر تۇرعىندار قىس مەزگٸلٸندە ٷيدەگٸ جيھازدىڭ بٸر بٶلٸگٸن قالدىرىپ, ەشكٸمگە ەسكەرتپەستەن كٶشٸپ كەتكەن.
«بٸر ادام قىستا كەتٸپ, جيھازدىڭ بٸر بٶلٸگٸن قالدىرعان. كەيبٸر زاتتارىن الىپ, ٷن-تٷنسٸز كٶشٸپ كەتكەن. تۇرعىندار بولماعان سوڭ, ٷيلەردٸ اشۋعا تۋرا كەلدٸ. ولاردى ٸزدەي باستاساق, تەلەفوندارىن ٶشٸرٸپ تاستاعان. سوندىقتان سوتقا تالاپ ارىز بەردٸك», – دەدٸ ول.
قازٸر جەرگٸلٸكتٸ بيلٸك مەملەكەتتٸك باسپانانى تاستاپ كەتكەن 40 وتباسىعا قاتىستى سوتقا تالاپ ارىز بەرگەن. شەنەۋنٸكتەر ولاردان مەملەكەت ەسەبٸنەن تٶلەنگەن كٶشۋ شىعىندارى مەن كٶتەرمەاقىنى قايتارۋدى تالاپ ەتٸپ وتىر.
الايدا ەكٸمدٸك ٶكٸلدەرٸ قاراجاتتى ٶندٸرٸپ الۋ ەردايىم مٷمكٸن بولا بەرمەيتٸنٸن مويىندايدى. سەبەبٸ كەيبٸر بۇرىنعى تۇرعىنداردى تابۋ قيىن, ال بٸرقاتار جاعدايدا شىعىندى ٶتەيتٸن ادام دا جوق.
