Qazaqstannyń sport salasy keiingi jyldary aitarlyqtai ilgeriledi. Halyqaralyq jarystardaǵy nátijelermen qatar, buqaranyń sportqa qyzyǵýshylyǵy da artyp keledi.
Týrizm jáne sport ministrliginiń málimetinshe, búginde 8,4 millionnan astam adam, iaǵni halyqtyń 40 paiyzdan kóbi turaqty túrde dene shynyqtyrýmen ainalysady.
Sport salasyndaǵy Qazaq Expert Club sarapshysy Evgenii Azarev endi basty nazar tek ósimge emes, bólingen qarjy men resýrstardy tiimdi basqarýǵa aýdarylýy kerek ekenin aitady, dep habarlaidy Dalanews.kz.
“2026 jyly Týrizm jáne sport ministrliginiń biýdjeti shamamen 263,5 mlrd teńgeni quraidy. Bul qarajat ulttyq quramalardy damytýǵa, olimpiadalyq daiyndyqqa jáne respýblikalyq jobalardy júzege asyrýǵa baǵyttalady.
Sonymen birge qarjynyń edáýir bóligi óńirlik deńgeide shoǵyrlanǵan. Oblystar men respýblikalyq mańyzy bar qalalardaǵy dene shynyqtyrý jáne sport basqarmalarynyń jiyntyq biýdjeti ministrlik qarjysymen shamalas. Mysaly, tek Almaty oblysynyń biýdjeti shamamen 16,7 mlrd teńgeni quraidy, al Almaty men Astana siiaqty iri qalalarda bul kórsetkish jyl saiyn ondaǵan milliard teńgege jetedi”, – deidi sarapshy.
Evgenii Azarevtiń pikirinshe, negizgi másele – basqarý júiesiniń óńirlik deńgeide úzilip qalýynda. Formaldy túrde jergilikti sport basqarmalary ministrlik strategiiasyna súiengenimen, is júzinde olardyń basymdyqtary kóbine jergilikti atqarýshy organdardyń mindetterimen aiqyndalady.
Sonyń saldarynan qarjy bólý teńgerimi buzylyp, qomaqty qarajat kásibi klýbtardy damytýǵa baǵyttalady da, buqaralyq jáne balalar sporty keide ekinshi kezekte qalyp qoiady.
Ekinshi mańyzdy faktor – derekterdiń ashyqtyǵy men naqtylyǵynyń jetkiliksizdigi.
“Ministrlik halyqtyń sportpen qamtylýy týraly málimet suratqanda, óńirler usynatyn esepter kei jaǵdaida josparly kórsetkishterge sáikestendirilip berilýi múmkin. Saldarynan strategiialyq sheshimder naqty jaǵdaidy tolyq kórsetpeitin derekter negizinde qabyldanady”, – deidi Azarev.
Sarapshy investitsiianyń tiimdiligin arttyrý úshin birneshe mańyzdy baǵytty atap ótti. Onyń aitýynsha, eń aldymen biýdjet saiasatyn úilestirý qajet.
“Óńirlik shyǵyndar ministrlik belgilegen ulttyq basymdyqtarǵa sai bolýy tiis. Sonymen qatar biryńǵai tsifrlyq esep júiesin engizý mańyzdy. Bul halyqtyń sportpen qamtylýyn, infraqurylymnyń jaǵdaiyn jáne bólingen qarjynyń qalai jumsalyp jatqanyn naqty baqylaýǵa múmkindik beredi.
Budan bólek, kadr saiasatyn da birizdendirý qajet. Atap aitqanda, óńirlik sport basqarmalarynyń basshylaryn taǵaiyndaý nemese olardy qyzmetke bekitý kezinde ministrlikpen kelisý tetigin engizý usynylady. Bul jalpy basqarý júiesiniń tutastyǵyn saqtap, salanyń tiimdi jumys isteýine yqpal etpek”, - dedi ol.
Sarapshynyń aitýynsha, Qazaqstan sportty damytý úshin berik negiz qalyptastyrǵan.
“Elde qajetti resýrstar da, infraqurylym da, sondai-aq aiqyn strategiialyq kózqaras bar. Endigi basty mindet – osy júieniń úilesimdi ári tiimdi jumys isteýin qamtamasyz etý”, – dep túiindedi sarapshy.
