قازاقستاننىڭ سپورت سالاسى كەيىنگى جىلدارى ايتارلىقتاي ىلگەرىلەدى. حالىقارالىق جارىستارداعى ناتيجەلەرمەن قاتار، بۇقارانىڭ سپورتقا قىزىعۋشىلىعى دا ارتىپ كەلەدى.
تۋريزم جانە سپورت مينيسترلىگىنىڭ مالىمەتىنشە، بۇگىندە 8،4 ميلليوننان استام ادام، ياعني حالىقتىڭ 40 پايىزدان كوبى تۇراقتى تۇردە دەنە شىنىقتىرۋمەن اينالىسادى.
سپورت سالاسىنداعى Qazaq Expert Club ساراپشىسى ەۆگەنيي ازاريەۆ ەندى باستى نازار تەك وسىمگە ەمەس، بولىنگەن قارجى مەن رەسۋرستاردى ءتيىمدى باسقارۋعا اۋدارىلۋى كەرەك ەكەنىن ايتادى، دەپ حابارلايدى Dalanews.kz.
“2026 جىلى تۋريزم جانە سپورت مينيسترلىگىنىڭ بيۋدجەتى شامامەن 263،5 ملرد تەڭگەنى قۇرايدى. بۇل قاراجات ۇلتتىق قۇرامالاردى دامىتۋعا، وليمپيادالىق دايىندىققا جانە رەسپۋبليكالىق جوبالاردى جۇزەگە اسىرۋعا باعىتتالادى.
سونىمەن بىرگە قارجىنىڭ ەداۋىر بولىگى وڭىرلىك دەڭگەيدە شوعىرلانعان. وبلىستار مەن رەسپۋبليكالىق ماڭىزى بار قالالارداعى دەنە شىنىقتىرۋ جانە سپورت باسقارمالارىنىڭ جيىنتىق بيۋدجەتى مينيسترلىك قارجىسىمەن شامالاس. مىسالى، تەك الماتى وبلىسىنىڭ بيۋدجەتى شامامەن 16،7 ملرد تەڭگەنى قۇرايدى، ال الماتى مەن استانا سياقتى ءىرى قالالاردا بۇل كورسەتكىش جىل سايىن ونداعان ميلليارد تەڭگەگە جەتەدى”، – دەيدى ساراپشى.
ەۆگەنيي ازاريەۆتىڭ پىكىرىنشە، نەگىزگى ماسەلە – باسقارۋ جۇيەسىنىڭ وڭىرلىك دەڭگەيدە ءۇزىلىپ قالۋىندا. فورمالدى تۇردە جەرگىلىكتى سپورت باسقارمالارى مينيسترلىك ستراتەگياسىنا سۇيەنگەنىمەن، ءىس جۇزىندە ولاردىڭ باسىمدىقتارى كوبىنە جەرگىلىكتى اتقارۋشى ورگانداردىڭ مىندەتتەرىمەن ايقىندالادى.
سونىڭ سالدارىنان قارجى ءبولۋ تەڭگەرىمى بۇزىلىپ، قوماقتى قاراجات كاسىبي كلۋبتاردى دامىتۋعا باعىتتالادى دا، بۇقارالىق جانە بالالار سپورتى كەيدە ەكىنشى كەزەكتە قالىپ قويادى.
ەكىنشى ماڭىزدى فاكتور – دەرەكتەردىڭ اشىقتىعى مەن ناقتىلىعىنىڭ جەتكىلىكسىزدىگى.
“مينيسترلىك حالىقتىڭ سپورتپەن قامتىلۋى تۋرالى مالىمەت سۇراتقاندا، وڭىرلەر ۇسىناتىن ەسەپتەر كەي جاعدايدا جوسپارلى كورسەتكىشتەرگە سايكەستەندىرىلىپ بەرىلۋى مۇمكىن. سالدارىنان ستراتەگيالىق شەشىمدەر ناقتى جاعدايدى تولىق كورسەتپەيتىن دەرەكتەر نەگىزىندە قابىلدانادى”، – دەيدى ازاريەۆ.
ساراپشى ينۆەستيسيانىڭ تيىمدىلىگىن ارتتىرۋ ءۇشىن بىرنەشە ماڭىزدى باعىتتى اتاپ ءوتتى. ونىڭ ايتۋىنشا، ەڭ الدىمەن بيۋدجەت ساياساتىن ۇيلەستىرۋ قاجەت.
“وڭىرلىك شىعىندار مينيسترلىك بەلگىلەگەن ۇلتتىق باسىمدىقتارعا ساي بولۋى ءتيىس. سونىمەن قاتار ءبىرىڭعاي سيفرلىق ەسەپ جۇيەسىن ەنگىزۋ ماڭىزدى. بۇل حالىقتىڭ سپورتپەن قامتىلۋىن، ينفراقۇرىلىمنىڭ جاعدايىن جانە بولىنگەن قارجىنىڭ قالاي جۇمسالىپ جاتقانىن ناقتى باقىلاۋعا مۇمكىندىك بەرەدى.
بۇدان بولەك، كادر ساياساتىن دا بىرىزدەندىرۋ قاجەت. اتاپ ايتقاندا، وڭىرلىك سپورت باسقارمالارىنىڭ باسشىلارىن تاعايىنداۋ نەمەسە ولاردى قىزمەتكە بەكىتۋ كەزىندە مينيسترلىكپەن كەلىسۋ تەتىگىن ەنگىزۋ ۇسىنىلادى. بۇل جالپى باسقارۋ جۇيەسىنىڭ تۇتاستىعىن ساقتاپ، سالانىڭ ءتيىمدى جۇمىس ىستەۋىنە ىقپال ەتپەك”، - دەدى ول.
ساراپشىنىڭ ايتۋىنشا، قازاقستان سپورتتى دامىتۋ ءۇشىن بەرىك نەگىز قالىپتاستىرعان.
“ەلدە قاجەتتى رەسۋرستار دا، ينفراقۇرىلىم دا، سونداي-اق ايقىن ستراتەگيالىق كوزقاراس بار. ەندىگى باستى مىندەت – وسى جۇيەنىڭ ۇيلەسىمدى ءارى ءتيىمدى جۇمىس ىستەۋىن قامتاماسىز ەتۋ”، – دەپ تۇيىندەدى ساراپشى.
