Sottalǵan eks-general Kúdebaevtyń otbasynyń basy taǵy daýǵa qaldy. Bul týraly Svidetel.KZ arnasy jazdy, - dep habarlaidy Dalanews.kz.
Arna málimetine súiensek, Almaty oblysynyń Jer resýrstaryn basqarý departamenti Serik Kúdebaevtyń uly Temirlan Myrzaqulǵa jáne oǵan tiesili "Keńsai-agro" JShS-ǵa, sondai-aq, burynǵy generaldyń aǵasy Muratbek Kúdebaevqa qatysty sot isin qozǵady.
"Almaty oblysy ekonomikalyq sotynyń 2024 jylǵy 2 aqpandaǵy jeke qaýlysyna sáikes, sóz 2015 jylǵy qarashada jáne 2019 jylǵy qazanda Jambyl aýdanynyń jer qatynastary bólimi burynǵy joǵary dárejeli politsiia qyzmetkeriniń aǵasy Muratbek Kúdebaevqa bergen jer ýchaskeleri týraly bolyp otyr.
Talapker jerdi berý kezinde zańbuzýshylyqtar bolǵan dep sanaidy. Sondai-aq, departament Muratbek Kúdebaev pen "Keńsai-agro" JShS arasynda 2020 jylǵy 8 jeltoqsanda jasalǵan jarǵylyq kapitalǵa berý týraly sharttyń kúshin joiýdy talap etip otyr. Anyq-qanyǵy ázirge belgisiz", - dep jazdy arna.
Buǵan deiin buqaralyq aqparat quraldary arqyly da Kúdebaevtyń otbasy aýyl sharýashylyǵymen ainalysatyny belgili.
"Onyń týǵan aǵasy Muratbek Kúdebaevtyń Almaty oblysyndaǵy Shien kentinde ornalasqan "Bolashaq" atty sharýa qojalyǵy bar. Statsnet portalynyń baǵalaýy boiynsha on jyl ishinde eks-generaldyń aǵasy agrobiznesten 390 million teńgeden asa aqsha taýyp, 8 million teńgege jýyq salyq tólegen", - dep jazylǵan arna málimetinde.
Svidetel.KZ derekterine súiensek, sottalǵan politsiia qyzmetkeriniń uly Temirlan Myrzaqul "Keńsai-agro" JShS-ǵa ielik etip otyr. Bul jaýapkershiligi shekteýli seriktestikke osyǵan deiin onyń nemere aǵasy Baqtiiar Ábdiraiymov quryltaishy jáne basshy bolǵan. Kásiporyn iri qara jáne býivol ósirýmen ainalysady.
Adata.kz málimetinshe, "Keńesai-agro" JShS (shaǵyn kásiporyn) 2020 jylǵy qazanda tirkelgen. Jalpy salyq aýdarymdary - 684 232 teńge (2024 jyly 14 350 teńge).
"2023 jyly kompaniia basshysy sot protsesine qatysyp úlgergen. 2021 jylǵy qyrkúiekte Temirlan Myrzaqul Ile aýdanynda aýmaǵy 279 gektar jer ýchaskesin jalǵa alǵan. Onyń yqpaldy ákesine qatysty qylmystyq is qozǵalǵannan keiin aýdandyq jer qatynastary bólimi kelisimshartty buzyp, ýchaskeni qaitaryp alǵysy keldi. 2023 jylǵy shildede Almaty oblysynyń ekonomikalyq soty jer berý týraly kelisimsharttyń kúshin joidy", - dep jazdy arna.
Byltyr kóktemde Serik Kúdebaev qańtar oqiǵasy boiynsha 10 jylǵa bas bostandyǵynan aiyryldy. Ol general-maior ataǵynan aiyrylyp, bilikti asyra paidalanǵany jáne azaptaý deregi úshin kináli dep tanyldy. Keiinirek oǵan Túrkiiaǵa qashqany úshin jarty jyl qosyldy. Eks-sheneýnik jazasyn ortasha qaýipsiz mekemede óteidi.
Oǵan kezinde halyqaralyq izdeý de jariialandy. Óitkeni ol shetel asyp ketti. Degenmen Kúdebaev resmi shekara beketterinen ótpegeni aityldy. Keiinirek Ulttyq qaýipsizdik komiteti qyzmetkerli Kúdebaevtyń taý ishinde jeke sharýashylyǵy bar ekenin de málimdedi. Bul aqparat onyń elden qalai qashýy múmkin ekenin anyqtaý barysynda aiqyndaldy.
"Boljam bar. Jumys jalǵasyp jatyr. Túsinesizder ǵoi, taý jotasy 672 shaqyrym bolady. Onyń ózi týǵan jerde - taýǵa jaqyn eldi mekende sharýa qojalyǵy bar. Jaqsy jolserikter bolýy da múmkin. Taý arqyly shyǵatyn nusqany qarastyryp jatyrmyz", - dep túsindirgen edi sol kezde Aldajumanov.
Aqyr aiaǵynda Kúdebaev Túrkiiadan ustalyp, elge ákelindi.
