سوتتالعان ەكس-گەنەرال كۇدەبايەۆتىڭ وتباسىنىڭ باسى تاعى داۋعا قالدى. بۇل تۋرالى سۆيدەتەل.KZ ارناسى جازدى، - دەپ حابارلايدى Dalanews.kz.
ارنا مالىمەتىنە سۇيەنسەك، الماتى وبلىسىنىڭ جەر رەسۋرستارىن باسقارۋ دەپارتامەنتى سەرىك كۇدەبايەۆتىڭ ۇلى تەمىرلان مىرزاقۇلعا جانە وعان تيەسىلى "كەڭساي-اگرو" جشس-عا، سونداي-اق، بۇرىنعى گەنەرالدىڭ اعاسى مۇراتبەك كۇدەبايەۆقا قاتىستى سوت ءىسىن قوزعادى.
"الماتى وبلىسى ەكونوميكالىق سوتىنىڭ 2024 جىلعى 2 اقپانداعى جەكە قاۋلىسىنا سايكەس، ءسوز 2015 جىلعى قاراشادا جانە 2019 جىلعى قازاندا جامبىل اۋدانىنىڭ جەر قاتىناستارى ءبولىمى بۇرىنعى جوعارى دارەجەلى پوليسيا قىزمەتكەرىنىڭ اعاسى مۇراتبەك كۇدەبايەۆقا بەرگەن جەر ۋچاسكەلەرى تۋرالى بولىپ وتىر.
تالاپكەر جەردى بەرۋ كەزىندە زاڭبۇزۋشىلىقتار بولعان دەپ سانايدى. سونداي-اق، دەپارتامەنت مۇراتبەك كۇدەبايەۆ پەن "كەڭساي-اگرو" ج ش س اراسىندا 2020 جىلعى 8 جەلتوقساندا جاسالعان جارعىلىق كاپيتالعا بەرۋ تۋرالى شارتتىڭ كۇشىن جويۋدى تالاپ ەتىپ وتىر. انىق-قانىعى ازىرگە بەلگىسىز"، - دەپ جازدى ارنا.
بۇعان دەيىن بۇقارالىق اقپارات قۇرالدارى ارقىلى دا كۇدەبايەۆتىڭ وتباسى اۋىل شارۋاشىلىعىمەن اينالىساتىنى بەلگىلى.
"ونىڭ تۋعان اعاسى مۇراتبەك كۇدەبايەۆتىڭ الماتى وبلىسىنداعى شيەن كەنتىندە ورنالاسقان "بولاشاق" اتتى شارۋا قوجالىعى بار. Statsnet پورتالىنىڭ باعالاۋى بويىنشا ون جىل ىشىندە ەكس-گەنەرالدىڭ اعاسى اگروبيزنەستەن 390 ميلليون تەڭگەدەن اسا اقشا تاۋىپ، 8 ميلليون تەڭگەگە جۋىق سالىق تولەگەن"، - دەپ جازىلعان ارنا مالىمەتىندە.
سۆيدەتەل.KZ دەرەكتەرىنە سۇيەنسەك، سوتتالعان پوليسيا قىزمەتكەرىنىڭ ۇلى تەمىرلان مىرزاقۇل "كەڭساي-اگرو" جشس-عا يەلىك ەتىپ وتىر. بۇل جاۋاپكەرشىلىگى شەكتەۋلى سەرىكتەستىككە وسىعان دەيىن ونىڭ نەمەرە اعاسى باقتيار ءابدىرايىموۆ قۇرىلتايشى جانە باسشى بولعان. كاسىپورىن ءىرى قارا جانە بۋيۆول وسىرۋمەن اينالىسادى.
Adata.kz مالىمەتىنشە، "كەڭەساي-اگرو" ج ش س (شاعىن كاسىپورىن) 2020 جىلعى قازاندا تىركەلگەن. جالپى سالىق اۋدارىمدارى - 684 232 تەڭگە (2024 جىلى 14 350 تەڭگە).
"2023 جىلى كومپانيا باسشىسى سوت پروسەسىنە قاتىسىپ ۇلگەرگەن. 2021 جىلعى قىركۇيەكتە تەمىرلان مىرزاقۇل ىلە اۋدانىندا اۋماعى 279 گەكتار جەر ۋچاسكەسىن جالعا العان. ونىڭ ىقپالدى اكەسىنە قاتىستى قىلمىستىق ءىس قوزعالعاننان كەيىن اۋداندىق جەر قاتىناستارى ءبولىمى كەلىسىمشارتتى بۇزىپ، ۋچاسكەنى قايتارىپ العىسى كەلدى. 2023 جىلعى شىلدەدە الماتى وبلىسىنىڭ ەكونوميكالىق سوتى جەر بەرۋ تۋرالى كەلىسىمشارتتىڭ كۇشىن جويدى"، - دەپ جازدى ارنا.
بىلتىر كوكتەمدە سەرىك كۇدەبايەۆ قاڭتار وقيعاسى بويىنشا 10 جىلعا باس بوستاندىعىنان ايىرىلدى. ول گەنەرال-مايور اتاعىنان ايىرىلىپ، بيلىكتى اسىرا پايدالانعانى جانە ازاپتاۋ دەرەگى ءۇشىن كىنالى دەپ تانىلدى. كەيىنىرەك وعان تۇركياعا قاشقانى ءۇشىن جارتى جىل قوسىلدى. ەكس-شەنەۋنىك جازاسىن ورتاشا ءقاۋىپسىز مەكەمەدە وتەيدى.
وعان كەزىندە حالىقارالىق ىزدەۋ دە جاريالاندى. ويتكەنى ول شەتەل اسىپ كەتتى. دەگەنمەن كۇدەبايەۆ رەسمي شەكارا بەكەتتەرىنەن وتپەگەنى ايتىلدى. كەيىنىرەك ۇلتتىق قاۋىپسىزدىك كوميتەتى قىزمەتكەرلى كۇدەبايەۆتىڭ تاۋ ىشىندە جەكە شارۋاشىلىعى بار ەكەنىن دە مالىمدەدى. بۇل اقپارات ونىڭ ەلدەن قالاي قاشۋى مۇمكىن ەكەنىن انىقتاۋ بارىسىندا ايقىندالدى.
"بولجام بار. جۇمىس جالعاسىپ جاتىر. تۇسىنەسىزدەر عوي، تاۋ جوتاسى 672 شاقىرىم بولادى. ونىڭ ءوزى تۋعان جەردە - تاۋعا جاقىن ەلدى مەكەندە شارۋا قوجالىعى بار. جاقسى جولسەرىكتەر بولۋى دا مۇمكىن. تاۋ ارقىلى شىعاتىن نۇسقانى قاراستىرىپ جاتىرمىز"، - دەپ تۇسىندىرگەن ەدى سول كەزدە الداجۇمانوۆ.
اقىر اياعىندا كۇدەبايەۆ تۇركيادان ۇستالىپ، ەلگە اكەلىندى.
