Eks-ministr Qýandyq Bishimbaev pen onyń týysy Baqytjan Baijanovqa qatysty sot tergeýi aiaqtaldy. Keshegi sot otyrysynda olar óz ustanymdaryn aitty, - dep habarlaidy Dalanews.kz.
Sýdia Aijan Qulbaeva Bishimbaevqa basty sot otyrysynda prokýror aiyptaý aktisin oqyp, aiyp taǵyp, taǵylǵan aiyptar boiynsha óz ustanymyn naqtylaǵanda, eki bap boiynsha da kinásin tolyq moiyndamaǵanyn eske saldy.
"Endi sot tergeýi aiaqtalǵannan keiin sizdiń jaýaptaryńyz tyńdalyp, kýágerlerden jaýap alynyp, aýdio-video jazbalar qaralyp, qylmystyq is materialdary zerttelip bolǵannan keiin sizdiń ustanymyńyz burynǵydai qala ma?" - dep surady sýdia.
"Tóreshi, qurmetti alqabiler, men azaptaý boiynsha óz kinámdi moiyndamaimyn", - dep jaýap berdi sottalýshy.
"Sizdiń azaptaý boiynsha ustanymyńyz sol kúiinde qaldy. Tolyq moiyndamaisyz ba?" - dedi Aijan Qulbaeva.
"Iá, moiyndamaimyn", - dedi Bishimbaev.
Sýdia Bishimbaevtan ekinshi epizod – erekshe qatygezdikpen óltirý boiynsha da ustanymyn surady.
"Ekinshi epizodtyń maǵan erekshe qatygezdikpen qasaqana kisi óltirdi degen aiyp taǵylǵan bóliginde men Núkenovanyń ólimine ákep soqtyrǵan soqqylardy jasaǵanymdy moiyndaimyn, biraq ony qasaqana jasaǵanymdy moiyndamaimyn", - dep jaýap berdi Bishimbaev.
Ekinshi sottalýshy Baqytjan Baijanov ta óz ustanymyn aitty. Ol kinásin moiyndaǵan joq.
"Meniki jasyryp qalý boiynsha, biraq men eshteńeni jasyrǵan joqpyn. Meniń ondai nietim bolǵan joq. Bishimbaev maǵan jazdy, men oryndadym. Men onda ne bolǵanyn bilgen joqpyn jáne jazbany kórmedim. Jasyryp qalý boiynsha moiyndamaimyn. Habarlamaý boiynsha - men bile salysymen, birden habarladym, jedel járdemge qońyraý shaldym. Taǵylǵan aiyptar boiynsha moiyndamaimyn. Biraq meniń kinám bar. Jedel járdemdi erterek shaqyrýyma bolar edi. Bul úshin kinálimin", - dedi Baijanov.
Taraptardyń jaryssózderi 29 sáýirde bastalyp, 30 sáýirde, sondai-aq, 2, 3 jáne 4 mamyrda jalǵasady.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube kanalynan onlain tamashalady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Sondai-aq, onyń týysy Baqytjan Baijanov ta kúdikti retinde qamaýǵa alyndy. Oǵan qylmystyq kodekstiń eki baby boiynsha aiyp taǵylǵan. Naqtyraq aitsaq, 432-baby (asa aýyr qylmysty jasyryp qalý); 434-baby (asa aýyr qylmysty habarlamaý).
